भांगरभूंय | प्रतिनिधी
कविता सर्तींतल्या जैतिवंतांक भेटयतले इनामां
पणजीः गोवा कोंकणी अकादेमी, गोंय आनी अपूर्व प्रकाशन, मंगेशी आयोजीत साहित्य अकादेमी पुरस्कार प्राप्त कवी आनी लेखक सर्गेस्त संजीव वेरेंकार हांचे पयले पुण्यतिथी निमतान 17 मार्च 2024 ‘संजीव स्मृती’ ही कार्यावळ जातली. ही कार्यावळ पणजेच्या इन्स्टिट्यूट मिनेझीस ब्रागांझा सभाघरांत सांजेच्या साडेतीन वरांचेर सुरू जातली. गोवा कोंकणी अकादेमीचे प्रभारी अध्यक्ष वसंत सावंत हांचे अध्यक्षताये खाल जावपी कार्यावळींत संजीवाच्या कवितांचेर प्रा. जयप्रभू कांबळी हांचे उलोवप जातलें.
तशेंच स. संजीव वेरेंकार हांच्या कवितांचे सादरीकरण जातलें. कवी ग्वादालूप डायस अध्यक्ष म्हूण हाजीर रावतली. निमंत्रीत कवी मदीं अमेय नायक, महादेव गांवकार, मानसी धाऊस्कार, गौरांग भांडये आनी कक्षम नायक हांचो आस्पाव आसा.
ह्या वेळार अपूर्व प्रकाशनान जाहीर केल्ले स. संजीव वेंरेकार यादस्तीक पयले अखील भारतीय कोंकणी कविता लेखन सर्तींतल्या जैतिवंताक इनामां भेटयतले. जैतिवंत कवींचीं नांवां अशीं आसात. रवींद्र म्हाड्डोळकार, पयलें इनाम, सौ.सुनिता प्रकाश पेडणेंकार, दुसरें इनाम तर तिसरें इनाम अंजली किणी हांकां फावो जालां. उमेद वाडोवपी इनामां एनी दी कोलवाळे, सोनाली श्याम प्रभू, सारीका नायक आनी सखाराम शेणवी बोरकार हांकां फावो जाल्यांत.
सर्तींत वट्ट 89 कवींनी वांटो घेतिल्लो. सर्तीचें परिक्षण नामनेचे साहित्यीक, समिक्षक डॉ. प्रकाश वजरीकर आनी प्रसिध्द कवियत्री ग्वादालूप डायस हांणी केल्लें. जैतिवंत कवींक रोख रक्कम, यादस्तीक आनी प्रमाणपत्र भेटयतले. तशेंच सर्तींत वांटेकार जाल्ल्या सगल्या कवींक प्रमाणपत्रां भेटयतले. कार्यावळीचें सुत्रसंचालन राधिका कामत सातोस्कार करतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
