भांगरभूंय | प्रतिनिधी
पणजी: केंद्रीय तशेंच राज्याच्या अर्थसकल्पांत दिव्यांग व्यक्तीं खातीर 5 टक्के तजवीज करची, अशी मागणी ड्रॅग संघटणेचें अव्हेलिना डिसा हांणी केल्या. बुधवारा पणजेे जाल्ले पत्रकार परिशदेंत ते उलयताले. दिव्यांग व्यक्तीक राज्यसभेंत उमेदवारी दिवप आनी सगल्या राज्यांतल्या विधानसभेंत आनी पंचायतींनी 5 टक्के आरक्षण दिवचें, अशी मागणीय तांणी केल्या
देशभरांत 1 कोटी परस चड दिव्यांग व्यक्ती आसात. तांच्या हक्का खातीर देशभरांतल्या एनजीअो राष्ट्रीय दिव्यांग नेटवर्क हे संस्थे खाला एकठांय आयल्यात. लोकसभा वेंचणुकेच्या फाटभुंयेर दिव्यांग नेटवर्क वतीन 10 मागण्यो केल्यात. सगल्या राजकी पक्षांनी ते विशीं विचार करचो, अशेंय डिसा हांणी म्हणलें.
राजकी आरक्षणा खेरीत आमच्यो मुळाव्यो मागण्यो पुराय जावप गरजेचें. हातूंत सगल्या दिव्यांगांक भलायकी विमो दिवप, म्हयन्याक 5 हजार रुपया निवृत्ती वेतन दिवप, फुडल्या तीन वर्सांत सगल्यो सरकारी इमारती दिव्यांग स्नेही करप, अश्यो मागण्यो आमी केल्यात, अशें डिसा हांणी सांगलें.
राष्ट्रीय दिव्यांगजन आयोगाच्या आयुक्तांनी कांय म्हयन्यां पयलीं एक आदेश काडिल्लो.ते प्रमाण ज्यो सरकारी इमारती दिव्यांग स्नेही नात थंय सरकारी अधिकाऱ्यांनी तळमाळयेर येवन दिव्यांगांक मेळप गरजेचें. ह्या आदेशाक पाळो दिनात. हे विशीं आमी राज्य आयोगा कडेन कागाळ केल्या. नुतनीकरण केल्ले दरबार सभाघर तशेंच कला अकादमी लेगीत दिव्यांग स्नेही नाशिल्ल्याचो आरोप डिसा हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
