भांगरभूंय | प्रतिनिधी
भांगरभूंय । प्रतिनिधी
काणकोणः म्हयन्यांक लाखांनी रुपया सरकारी तिजोरेंत जमा करपी चावडी- काणकोण हांगच्या येरादारी कार्यालयाची अवस्था ना घरका ना घाटका अशी जाल्या. थंयचो कारभार उक्ताडार चलता. काणकोणच्या कदंब म्हामंडळाचे इमारतींतले पयले माळेर येरादारी खात्याचें कार्यालय आसा. थंय सहाय्यक संचालक, दोन येरादारी निरीक्षक आनी हेर कर्मचारी मेळून 16 कर्मचारी काम करतात. ल्हान कुडींत हें कार्यालय फाटल्या कांय वर्सां सावन चलता. कर्मचाऱ्यांक आनी लोकांक थंय फिरपाक लेगीत मेळना.
ह्या कार्यालयांत नवे परवाने, येरादारी लायसनाचें नूतनीकरण, लर्निंग लायसन्स, टुरिस्ट टॅक्सी, रेंन्ट अ बायक, पासिंग अश्या जायत्या कामा खातीर लोकांची सदांच गर्दी आसता. कार्यालयांल्या एके कुडीचो उपेग गुदांव म्हणून केला. सहाय्यक अधिकारी उक्ताडार बसून निरीक्षक लोक ज्या कामा खातीर येतात ते सुवातेर टेबल घालून तांचीं कामां करतना दिसतात. हे कडेन मेकळी सुवात आसा. थंय स्वतंत्र कुडी तयार करून कार्यालयाचो दर्जो आनी व्याप वाडोवपाची वेवस्था करपाक जाता. ते खातीर सर्वे करून वर्स जालें तरी कांयच जाल्लें दिसना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
