भांगरभूंय | प्रतिनिधी
भांगरभूंय । प्रतिनिधी
दिवचलः पंतप्रधान नरेंद्र मोदी हांच्या फुडारपणा खाला फाटल्या धा वर्सांत देशांतले नारी शक्तीचे उदरगतीचीं दारां उक्तीं जाल्ल्यांत. अर्थीक, राजकी, सामाजीक, सांस्कृतीक मळार बायलांनी व्हडली उडी मारून आपल्या कर्तृत्वाचो बावटो हुबयला. बायलांक 33 टक्के आरक्षण दिवंन भारतीय राजकारणात स्त्री शक्तीक व्हडलो मान दिला, अशें मुख्यमंत्री डॉ प्रमोद सावंत हांणी सांगलें.
बायलां दिसा निमतान साखळेच्या रवींद्र भवनांत आयोजीत केल्ल्या नारी शक्ती वंदन संमेलनाचें उक्तावण केल्या उपरांत ते उलयताले. ह्या वेळार माचयेर भाजपा महिला मोर्चा फुडारी सुलक्षणा सावंत, साखळेची नगराध्यक्ष रश्मी देसाय, निकिता नायक, विनंती पार्सेकार, सिद्धी परब, साखळी मतदारसंघांतल्या पंचायतीच्यो बायल सरपंच, उपसरपंच, पंच वांगडी, नगरसेविका, भाजपा साखळी मंडळ अध्यक्ष गोपाळ सुर्लकार आशिल्ले. संमेलनांत बायलो व्हडा संख्येन हाजीर आशिल्ल्यो.
मोदीजींन ईकरा कोटी गरीब लोकांक घरां बांदून दितना तीं बालांच्या नांवार करपाचो कायदो हाडलो. उदक, वीज, गॅस सिलिंड अश्या येवजण्या वरवीं बायलांक घर चलयतना थाकाय मेळटली अशे तरेची वेवस्था केली. फाटल्या धा वर्सांत शेती कुशळताय उदरगत तशेंच कळंतर विणे रीण आनी हेर माध्यमांतल्यान बायलांक स्वावलंबी जावपाक व्हड योगदान दिलां अशें मुख्यमंत्र्यांनी सांगलें.
नारी शक्ती व्हड आशिल्ल्यान देशाच्या राजकारणांत बायलांचो सहभाग निर्णायक थारता, बायलांक खऱ्या अर्थान सबल करपाचे काम मोदीजीन केलां. गोंयांत स्वयंपूर्ण आनी आत्मनिर्भर येवजण्यांचो फायदो घेवन बायलो व्हडा संख्येन फुडें सरतात हे पळोवन खोस भोगता अशें तांणी सांगलें. बायलां खातीर आशिल्ल्या येवजण्याची तांणी नियाळ घेतलो. ह्या वेळार वेगवेगळ्या मळार वावुरतात तशेंच सरकारी येवजण्यांक चालना दिवपी महिला मंडळ, आपमजत पंगडाचे काम करपी बायल प्रतिनिधींचो मुख्यमंत्र्यांचे हस्तुकीं भोवमान केलो.
ह्या वेळार पंतप्रधान नरेंद्र मोदी हांणी बायलां खातीर दिल्ल्या संदेशाचे थेंट प्रक्षेपण मुख्यमंत्र्याचे उपस्थितींत बायलांनी पळयलें. सकाळीं नारी शक्ती वंदन संमेलना खाता साखळी हॉस्पिटल तें रवींद्र भवन मजगतीं व्हडली रॅली काडली. सुलक्षणा सावंत हिणे नारी शक्तीक खऱ्या अर्थान आत्मनिर्भर आनी स्वयंपूर्ण करपाक मोदी हांच्यो वेगवेगळ्यो येवजण्यो बऱ्यो थारल्यात अशें सांगून नारी शक्त खंबीरपणान भाजपाच्या फाटल्या आसा ताका लागून नरेंद्र मोदी परत पंतप्रधानपदार विराजमान जातले हातूंत दुबाव ना अशें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
