भांगरभूंय | प्रतिनिधी
एसटी समाज संघटनांनी सरकारान शिटकावणी
पणजी, बातमीदार : राज्यांतल्या अनुसूचित जमाती (ST) समाजाक राजकी आरक्षण मेळचें हे मागणे खातीर राज्यभर एसटी संघटणांनी आझाद मैदानाचेर उपोशणाक सुरवात केल्या. लोकसभा वेंचणुकेची आचासंहिता लागू जावचे पयलीं विधानसभेंत एसटी समाजाक आरक्षण दिवपी अधिसुचवणी जारी करची, नाजाल्यार आंदोलन खर करतले अशी शिटकावणी ह्या संघटणांनी ह्या वेळार दिली. आंदोलनांत रुपेश वेळीप, रामा काणकोणकार आनी हेर एसटी फुडारी हाजीर आशिल्ले.
राज्यांत एसटी समाजाक राजकीय आरक्षण मेळपाचो प्रस्न फाटल्या कितल्याशाच वर्सा सावन आसा. आरक्षण मेळप हो आमचो ‘संविधानीक अधिकार’. मात, २०१४ सावन आमकां फकत आस्वासनां दितात. हे विशीं २८ फेब्रुवारीक जाल्ले केंद्रीय मंत्रिमंडळाचे बसकेंत हो विशय येतलो, अशें आस्वासन आमकां दिल्लें. मात हाचे उपरांत दोन कॅबिनेट बसका जाल्यो तरी हो विशय चर्चेक येवंक ना. हे विशीं आमी दोन दिसां पयलीं मुख्यमंत्री डॉ. प्रमोद सावंत हांचे कडेन उलोवप केल्लें. मात अधिसुचवणी येवंक नाशिल्ल्यान आमी उपोशण करपाचो निर्णय घेतला. जे मेरेन अधिसुचवणी येना तो मेरेन आमचे उपोशण आमी चालूच दवरतले, अशें वेळीप हांणी म्हणलें.
लोकसभा वेंचणुकेचे आचारसंहिते आदीं राजकी आरक्षणा विशीं अधिसुचवणी जारी जावप गरजेचें. फाटल्या कांय वर्सां सावन हो प्रस्न सोडोवपा खातीर राजकीय इत्सा शक्तीचो उणाव दिसता. राज्यांत १ लाख ८० हजार एसटी भाव- भयणीं आसात. भाजपाक तांची मतां जाय जाल्यार आरक्षण मेळप गरजेचें. आमकां कोणाकूच त्रास दिवपाचें नात. मात आमचो अधिकार आमकां मेळपाक जाय, अशें काणकोणकार हांणी ह्या वेळार म्हणलें.
केंद्रीय मंत्री श्रीपाद नायक हांणी आंदोलन करपी एसटी समाजांतल्या फुडार्यांक भेट दिली. हे विशीं राज्य तशेंच केंद्र सरकार यत्न करतात. ही प्रक्रिया सुरू जाल्या. हाका लागून कांय काळ लागपाक शकता. तरीय हांव स्वता केंद्रीय गृहमंत्री अमित शहा हांचे कडेन हे विशीं उलयतलों, अशें मंत्री नायक हांणी फुडार्यांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
