भांगरभूंय | प्रतिनिधी
चेन्नय, खबरां संस्था ः तमिळनाडूच्या मंडपम दर्या लागसार बोटींतल्यान सुमार 108 कोटी रुपयांचें 99 कील चरस जप्त केला. डायरेक्टरेट ऑफ रेव्हेन्यू इंटेलिजन्स (DRI), चेन्नय झोनल युनिट आनी इंडियन कोस्ट गार्ड मंडपम हांणी संयुक्तपणान ही कामगिरी केल्या.
ही बोट श्रीलंके वटेन वताली. मंडपम दर्यादेगे लागसार दर्यादेगेवेल्या मार्गांतल्यान भारतांतल्यान श्रीलंकेंत अमली पदार्थांची तस्करी जाता अशी म्हायती अधिकाऱ्यांक मेळ्ळी. हाचे उपरांत 4 आनी 5 मार्चाच्या मध्यान रातीं अधिकाऱ्यांनी दर्यादेगेर नदर दवरुन बोटीक धरली आनी घुंवळें वखदां जप्त केलीं.
चड म्हायती प्रमाण, खोल दर्यांत नदर दवरुन महसूल गुप्तचर संचालनालय आनी तटरक्षक दळाक श्रीलंके वटेन वचपी बोट दिसली उपरांत बरोच वेळ तिचो फाटलाव करुन तिका आडायली. बोट जप्त केल्या उपरांत अधिकाऱ्यांनी तिची तपासणी केली तेन्ना भितर ड्रग्साच्यो पांच पोतयो लिपयल्ल्यो मेळ्ळ्यो. ड्रग्स आनी बोटींतल्या तिगांक फुडले चवकशे खातीर मंडपम हांगाच्या कोस्ट गार्ड स्टेशनाचेर हाडले. ह्यो ड्रग्साच्यो पोतयो पंबन दर्यादेगेवेल्या वाठारांतल्या मनशान दिल्या आनी श्रीलंकेंतल्या एका अनवळखी मनशाक दिवपाक सांगलां अशें तांणी सांगलें.
हाचे उपरांत डीआरआयन पंबन वाठारांतल्या त्या मनशाक ताब्यांत घेतलो. तांचे चवकशेंत तो मनीस दर्यादेगेवेल्या मार्गांतल्यान भारतांतल्यान श्रीलंकेंत ड्रग्स तस्करी करपाचो मास्टरमाइंड आशिल्ल्याचें स्पश्ट जालें. ड्रग्स श्रीलंकेंत पावोवपा खातीर देशांतल्या वेगवेगळ्या वाठारांतल्यान ड्रग्स हाडिल्ल्याचेय ह्या चवकशेंत स्पश्ट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
