गोडेंमूताचें दुयेंस पयस करपाक सदांच व्यायाम गरजेचो

भांगरभूंय | प्रतिनिधी

व्यायाम सगळ्यां खातीर गरजेचो, मात जांकां गोडेंमूत (डायबेटीस) व्यायामाक प्राधान्य दिवचें. रगतांतली साकर उणी करपा वांगडाच व्यायामाक लागून ब्लड प्रेशरूय उणो जाता. तशेंच व्यायामाक लागून बरी न्हीद येवपाक मजत जाता. व्यस्त जिणे पद्दतीक लागून आमच्यांतल्या जायत्या जाणांक वेळ मेळप कठीण जाता, पूण व्यायामाक पर्याय ना. देखून कितलेंय व्यस्त आसले तरी व्यायामाक थोडो वेळ दिवचो.
गोडेंमुताचें दुयेंस हें ह्या दिसांनी व्हड समस्या जाल्या. भारत ही ताची राजधानी. सामके ल्हान भुरगे ते जाण्ट्यां मेरेन जायत्या जाणांक गोडेंमूत जाता. गोडेंमूत पातळ्ळ्या उपरांत ताचेर नियंत्रण दवरपा बगर पर्याय ना. कारण गोडेंमूत कुडींत बरेंच ल्हव पातळटा. रगतांतली साकर नियंत्रणांत ना जाल्यार ताचो परिणाम वेगवेगळ्या अवयवांचेर जात. देखून साकर नियंत्रणांत दवरप हें एक व्हड आव्हान. देखूनच आयज आमी तुमकां पांच तरेचे व्यायाम सांगतले, जाचे वरवीं रगतांतली साकर नियंत्रीत करूं येता.
व्यायामाविशीं…
एरोबीक व्यायाम : एरोबीक स्वरूपाचे व्यायाम वा कार्डिओ व्यायाम, गोडेंमूत आनी प्री- डायबेटीस परिस्थितींत फायद्याचे आसात. ह्या व्यायामांत जावपी हालचाली काळजाची गती वाडयतात आनी स्वास सुदारता. जातूंत जॉगिंग, सायकलिंग वा पेंवप हाचो आसपाव आसा. एरोबीक व्यायामाक लागून प्रतिकारशक्त वाडटा, तशेंच वजन देंवोवपाक आनी रगतांतले साकरेची पातळी देंवोवपाक मजत जाता. एरोबीक व्यायाम तुमी घरांत वा घरा भायर दोनूय सुवातांचेर करपाक शकतात. चडांत चड फायदो जावचे खातीर सप्तकांत उण्यात उणें 150 मिनटां एरोबीक व्यायाम करपाचो सल्लो दितात.
योग : संशोधनांतल्यान अशें कळ्ळां, योगासन आनी प्राणायम गोडेमुताच्या वेवस्थापनांत म्हत्वाची भुमिका करता. रगतांतले साकरेची पातळीय देंवयता. कांय आसनांक लागून शरिरांतल्या वायट कोलेस्ट्रॉलाची पातळीय उणी जाता. त्रिकोनासन, ताडासन, सुखासन, पद्मासन, मंडुकासन, भस्त्रिका प्राणायाम, अर्धमत्स्येंद्रासन, पवनमुक्तासन, भुजंगासन, वज्रासन आनी धनुरासन हीं आसनां गोडेंमुत जाल्ल्यां खातीर फायद्याचीं.
सूर्यनमस्कार : सूर्यनमस्कार हो एक पुराय व्यायाम. हातूंत पांयांच्या बोटां सावन तकले मेरेनच्या दरेका अवयवाक फायदो जाता. सूर्यनमस्कार केल्ल्यान तुमच्या शरिराची स्थिती सुदारता. हें तुमच्या स्नायूं खातीर फायद्याचें. बॅकबोन दुखप, मान दुखप आनी फाट दुखप उणें करता. सदांच सूर्यनमस्कार केल्यार शरीराची मुद्रा बरी उरता. जीव हलको जाता आनी स्नायू घटमूट आनी बरे स्थितींत आसता. सूर्यनमस्कार करतना स्वास घेतना विशेश लक्ष दिवचें पडटा. दरेक वेळा व्हडलो स्वास थघेवन तो ल्हव ल्हव सोडचो पडटा. ताका लागून तुमचें फुफ्फूस घटमूट उरता आनी ताची तांकूय वाडटा.
स्ट्रेंथ ट्रेनिंग : स्ट्रेंथ ट्रेनिंग हो एके तरेचो शरिराचो व्यायाम जो स्नायू वाडपा खातीर, पचन सुदारपाक आनी प्रतिकारशक्त वाडपा खातीर करतात. हे 40 वर्सां पिराये परस चड पिरायेच्या बायलां खातीर फायद्याचें हाका लागून संतुलन, गतिशीलताय आनी आत्मविश्वासूय सुदारता. गोडेमूत आशिल्ल्यां खातीर हो व्यायाम म्हत्वाचो.