उणाव

भांगरभूंय | प्रतिनिधी

वयर बरी गोड गोड उलयता. ल्हवुच पाड्डेपणाच्या उतरांचो डोस असो दिता. दर एक मोलादीक, खोशयेच्या खिणाची माती करून वडयता.

तुका दोन मार्क चड पडपाचे, “कित्याक गो मम्मा? अशें कित्याक म्हणटा?”
“नंदाक चड मार्क जाले ना?
“अशें कितें गो मम्मा?”
“तशेंच गो तें.” आवय आपल्याक कसलो समज दिता तें साद्या प्रिताच्या लक्षांत आयलें ना. दुसरे दिसा फ्रिजा वेल्यान चर्चा जाली तेन्ना आवयन फॅमिली फ्रिजाची मागणी केली. बायलेक भेंट म्हूण घोवान तेंय मान्य केले. चड पयशे लागले. हाडटकर सांगलें. शेजान्न मिसेस गोमती हांगेर ल्हान आसा म्हूण तिका जायंट जाय आशिल्लो. व्हडलें कोणेच लक्ष दिलें ना. पूण ‘जायंट’ फ्रिजाचें कारण समजलें. फ्लॅटाची मागणी करीत आशिल्ली.
“आगो आसा तें सांबाळप कठीण जाता…. आनी कित्याक तकली खाता?”
मिसेस गोमतीन नवो प्लॉट घेतलो. आमी कित्याक घेवचो न्हय? तीं…कितें…तांची…खीं..खीं.. करून हांसली आनी तेन्नाच तिचीं भुरगीं आनी घोव अजाप जालो. शिकिल्ली संवरिल्लीं ही आनी विचार कसले? हिका कशें समजावप? तरी आसुं सोडून दिवया म्हूण भुरग्यांनीय आवयचें उलोवणें कानामनार घेतलें ना. घोवान आपले बायलेचो हट्ट पुरो केलो. शांताबाय भोव धादोशी जाली. आतां तिचीं सर्त खऱ्या अर्थान पूर्ण जाली. मिसेस गोमती परस आपूण श्रेष्ठ हें दाखोवपाक ती कोत्या विचारांत रमताली. खंयच्या मॉलात वचपाचें. कपडे साडयो घेवपाचें आसतालें, पूण “मिसेस गोमती परस आपूण व्हड” हेंच जणू सगळ्या मुखार सिद्ध करपाचें आशिल्लें.
शांताबाय टुरार वताली. मिसेस गोमतीचो तोरो देंववपाक. “स्वताक कितें समजता व्हडली?”
खरें म्हळ्यार असलो “न्हयकारात्मक न्यूनगंड” आशिल्लो मनीस आपले भोंवतणचो वाठार… खदुळ करून वडयता. मनांची वाट लायता. तिका समजायतलो कोण? बाबडीं घरची नमळायेन सोंसताली.
“तुमचे परस म्हज्या घरकारान हाडिल्ली साडी मात्शी म्हारगच आसा. तुमकां परवडचें ना.”
“अशें कित्याक म्हणटात तुमी?”
“पगारूय चड, जोडय चड आसूंक जाय न्हय.”
‘अशें म्हारग हाडप, मोडप, भोंवप…भुरग्यांलो खेळ न्हय.”
उलोवपांतल्यान दर खिणांक दुसऱ्याक तोमणों, खुटलो, चिमटो, धुमको आसतालो. शाण्या लोकांनी तिका कान दिवपाचें सोडून दिल्लें. पूण जित्याची खोड खंय मेले बगर वचना.
आमचें रांदप बरें, जेवण अशें. जें कितें बरें तें शांताबायेचें. अशें तिचें पंचवर्सुकी धोरण आशिल्लें.
“तो म्हजो नातु. मार्कच न्हय सगळ्या विशयांत पयलो”.
“तुजी नात पास जाली, न्हय…तशें न्हय जमता ताका शिकपाक?” कुचित्रीपणान उलोवपांत तिजो हात धरपी कोणूच नाशिल्लो. ‘शेनवारा पार्टी, रोशनालो वाढदीस न्हय. तुमचे बायेचोय मनोवपाचो आसा न्हय? आमची मातशी पार्टी पेजाद म्हणटात. ओंदुं बायेक 21 वर्सां जातात म्हण……’
“आमचें सादेंच गो सगळें.”
“बरोबर सगळ्याकूच खंय जमता. एक एक नशीब.”
“कितेंय गरज पडल्यार सांग गे.”
“आसूं गे, म्हळें तेंच व्हड जालें.”
“व्हडल्यालें खंय जुळ्ळां तर?”
“ना अजून कांय ना गो.”
“ह्या आज काल चल्याक गोऱ्योच चलयो जाय. शिकिल्ली जाय, नोकरी करपीय जाय”
चलयोय कांय कमी ना गे आतां… चलयोय आपल्याक जाय त्या चल्या बरोबर लग्न जातात. दोगांचे उलोवपांतलो सूर वेगळोसो जाता अशें जांताच ती भलतोच विशय काडून माप आयले वाटेन झुकयताली. “तुमचें बाय काळें न्हय, चलो मेळपाक कठीणच.” आज काळें म्हळ्यार तोंड काळे करतात. पूण करतली कितें न्हय? नशीब बाबड्याचें. मेळटा गे मागीर कोणूय धोंगा-पोंगा आशिल्लो. तांचे नशिबान बरो देखणो खंयच्यान हाडटलें. बरें मानून घेवन रावपाचें.’
शांतबायची उलयिल्ली उतरां सुयेवरीं, केन्ना बाणावरीं भितर तोपतालीं. बाणाची माव निवळत, पूण हिणें दिल्ले उतरांचें आनी कांय कर्तुपांचे दाग मनशांक जगपाक आडमेळी करताले. रातीचे रातीं तिची तोखेसांवाचीं उतरां काळजां पिंजताली.
“भालो कशे तोपता ती काळजाक” शेजान्न मनांत म्हणटाली. वयर बरी गोड गोड उलयता. ल्हवुच पाड्डेपणाच्या उतरांचो डोस असो दिता. दर एक मोलादीक, खोशयेच्या खिणाची माती करून वडयता. शेजारचीं घरांत एकामेकां कडेन उलयताली. खंती जाताली. हे पिडेक वखद कितें?
कोणाक कांय सुचनाशिल्लें. तोंड बंद कोण आनी कशें करतलो? फकत दुसऱ्याक ‘उणाक’ लेखपाचो “नवो छंद” हांगां केल्ले खंय हांगाच मेळटा अशें म्हणटात तशेंच घडलें. शांताबायचें व्हडलें चली लग्न जालें. सीव्हील मॅरेज. शांताबायक आनी नाक उरलें ना. दुसऱ्याचें उस्तवारे करपी आपल्या पांया कडेन पळोवचो वेळ आयली. म्हणटात न्हय तांब्यान खंय केन्ना कपल बांदचें न्हय.
शांताबाय धा माळयेवेल्यान अशी जमनीर पडली तिचीं वाच्याच बंद जाली.
“मम्मा तूं सदांच लोकांचे धुताली म्हूण हांवे हो निर्णय घेतलो. बरो इंजिनीयर भुरगो आय-टी. वायट तो? काळो आसा. तुका कितें त्रास ना मगे?
शांताबायन इतलीं वर्सां धुविल्लें सगळें पांयां कडेन एकठावलें.
‘मम्मा म्हणून तूंच म्हणटा न्हय गे, एक बोट दुसऱ्याचेर करचे आदिं चार बोटां आपल्याचेर आसतात. आता तरी सुधार, बकच्छायो सोड.’

विजया शेळडेकार
91467 91523