भांगरभूंय | प्रतिनिधी
भांगरभूंय । प्रतिनिधी
फोंडेंः साकोड्डकारांक रगाडा न्हंयेचें उदक शुद्ध केल्या उपरांत ताची पुरवण करतात असो दावो बांदकाम खात्याच्या अभियंत्यांनी परत एक फावट केला.. लोकानी मागणी केल्ल्या प्रमाण फुडल्या दोन दिसांत टॅकरांतल्यान उदका पुरवण करतले. तशेंच ग्रामस्थ आनी पंचायत मंडळाचे हाजेरेंत उदकाचे नमूने घेवपाचें आस्वासन ताणी साकोड्डें पंचायत मंडळाक दिला.
रगाडा न्हंयेंत नुस्तें पालन प्रकल्पांतल्यान दुशीत उदक सोडल्ल्याचें ग्रामस्थाचें म्हणणे आसा. अशें आसतनाय बांदकाम खात्याच्या उदका पुरवण विभागान लोकांचे भलायकेचो विचार करनासतना उदका प्रकल्पांतल्यान उदका पुरवण चलयल्या. ताका लागून तिडकल्ल्या पंचायत मंडळान सरपंच प्रिया खांडेपारकार हिच्या फुडापणा खाला धारबांदोडें तालुक्यांतल्या बांदकाम खात्याच्या कार्यालयांत वचून अभियंत्यांची भेट घेतली. कार्यकारी अभियंतो लिस्टर डिसोझा, सहाय्यक अभियंतो देविदास बोरकार, आनी कनिश्ठ अभियंतो शैलेंद्र शेट हाचे कडेन तांणी चर्चा केली. लोकांचे भलायकेचे सुरक्षे खातीर टँकरान उदका पुरवण करपाचे निवेदन तांणी दिलें. न्हंयेच्या उदकाचे नमूने घेवन ते परत तपासपाक धाडपाचे उतर तांणी दिलें.
न्हंयेच्या दूशीत उदका वयल्यान लोक आक्रमक जाल्ले आसतना बांदकाम खात्याच्या अभियंत्यांनी घाळपणा चलयला. ते खातीर मंगळारा आमी तांचे कडेन चर्चा केली अशें उपसरपंच शिरीष देसाय हाणे सांगलें. तांणी शुद्धिकरण केल्ल्या उदकाचो अहवाल पंचायत मंडळाक दिल्लो. तातूंत लोकांक शुद्ध उदकाची पुरवण करतात अशें नमूद केलां. मात लोकांचे अजून समाधान जावंक ना देखून फडले दोन दीस टँकरांतल्या उदकाची पुरवण करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
