भांगरभूंय | प्रतिनिधी
वास्को, प्रतिनिधी: रस्तो सुरक्षा आनी येरादारी वेवस्थापनच्या विवीध समस्यांचेर उजेड घालपा खातीर रस्तो सुरक्षा जागरुकतायेचें आयोजन गोवा कॅनान कांसावले,- आरोसी- क्युयेले पंचायती वांगडा केलें. तशेंच थंय हाजीर आशिल्ल्यांचे मार्गदर्शन केलें. वेग मर्यादा पाळा, जीव वाचयात, तुमचे सुरक्षितताये खातीर सीट बेल्ट लायात, आयएसआयचें चिन्न आशिल्लें हॅल्मेट वापरात, झेब्रा क्रॉसिंगा वयल्यान वचप्यांचो आदर करात, अशे संदेश ह्या वेळार दिले.
हे जागृताय कार्यावळींत गोवा कॅन स्वयंसेवकां सयत पंचायत रस्तो सुरक्षा आनी येरादारी वेवस्थापन समितीचे वांगडी, येरादारी पुलीस कक्षाचे अधिकारी हाजीर आशिल्ले.
कार चालक, दुचाकी चालक, चलत वचप्यां खातीर बॅनर, तखटो, रंगयाळे बावटे घेवन जागूताय केली. रस्तो सुरक्षिततायेचे म्हत्व आनी आयएसआय चिन्न आशिल्लीं हॅल्मेटांचो वापर हे विशीं गांवांतल्या विवीध दोनचाकी चालकांनी स्वयंसेवकांक सकरात्मक प्रतिसाद दिलो. हे कृती कार्यावळींत गोवा कॅनचे समन्वयक रोलँड मार्टिन्स, सरपंच झेवियर परेरा, उपसरपंच मर्विला द कॉस्ता हांणी मार्गदर्शन केलें. जागृताये खातीर वास्को येरादारी पुलीस कक्षाचे निरीक्षक शैलेश नार्वेकार, निरीक्षक वामन पाटील, हवालदार हिरुलाल नायक हांणी सहकार्य केलें.
मजगतीं, गोवा कॅनान मुरगांव म्हालांतल्या ग्रामपंचायतीच्या रस्तो सुरक्षा आनी येरादारी वेवस्थापन समितींक एकठांय हाडून तांच्यो बसको घेवपाचो निर्णय घेतला. रस्ते अपघातांचे परिस्थितीचो आढावो घेवप, अभियांत्रिकी, अमलबजावणी, शिक्षण विशयांचेर रस्तो सुरक्षा प्रस्तावांचो मसुदो तयार करप, तो अधिकार्यांक सादर करप अश्यो गजाली हे बसकेंत सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
