भांगरभूंय | प्रतिनिधी
‘नॅवल वॉर’ म्हाविद्यालयाचे उक्तावण
पणजी, प्रतिनिधी : हिंद म्हासागर तशेच प्रशांत म्हासागर वाठारांत भारतीय नौदळाची तांक वाडत आसा. झुजा खातीरची तयारी तशेच वाडटी तांक हो भारत – प्रशांत (इंडो पॅसिफिक रीजन) म्हासागर वाठाराक धोको नासून शांतताय प्रस्थापित करपा खातीरचें पावल आसा, अशें संरक्षण मंत्री राजनाथ सिंह हांणी म्हणला.
राजनाथ सिंह हांणी मंगळारा सकाळीं गोंयाक भेट दिली. वेऱ्यां आयएनएस मांडवींत नॅवल वॉर म्हाविद्यालय इमारतीचें उक्तावण तांणी केले. हे वेळार मुख्यमंत्री डॉ. प्रमोद सावंत, केंद्रीय पर्यटन राज्यमंत्री श्रीपाद नायक आनी नौदळाचे अधिकारी हाजीर आशिल्ले.
नौदळ, हवाई दळ आनी सैन्य दळांत आत्मनिर्भर जावपा वटेन देशाची तयारी सुरू आसा. देशी तंत्रज्ञानाच्या वापरांत झुजा खातीरची विमानां तशेंच बोटी बांदपाची प्रक्रिया सुरू जाल्या. राजनिती आनी संस्कृती हांचो संबंध इतिहासिक काळा सावन आसा. चोल साम्राज्या सयत शिवाजी महाराजांच्या राजवटीतूय संस्कृती, दायज हांकां महत्व आशिल्लें. आयज नॅवल वॉर म्हाविद्यालय सुरु जावपी चोल भवन हेंय चोल साम्राज्याची एक याद आसा.
आयज मेरेन देशांत सैन्य दळ (जमीन सुरक्षा) सुरक्षेक महत्व दिलां. पाकिस्तान तशेंच चीन कडल्यान जमनी वेल्यान आक्रमण जालें. हाका लागून जमीन सुरक्षेक महत्व दिवपांत गैर ना. तरीय देशाच्या भोंवतडीक दर्याय आसा. दर्या मार्गातल्यान धोको निर्माण जावपाची शक्यता न्हयकारपाक येना. हें मतींत धरून देशान हिंदी म्हासागरा सयत दर्यांतली सुरक्षा वेवस्था घटमुट केल्या. देशा सयत शेजारच्या वाठारांत शांतिकाय प्रस्थापित जावची आनी संवसारात लोकशाय समृद्ध करपाचो हेत हाचे फाटल्यान आसा, अशें केंद्रीय रक्षा मंत्र्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
