भांगरभूंय | प्रतिनिधी
म्हापशें, प्रतिनिधी ः साल्वादोर द मुंद हांगा एका बंगल्यात पर्वरी पुलिसांनी धाड घालून बायलां क्रिकेट इंडियन प्रिमियर लीग (डब्ल्यूआयपीएल) सट्टेबाजी उक्ताडार हाडली. ह्या प्रकरणांत पुलिसांनी अस्तंत बंगालांतल्यान तीन दुबावितांक अटक केल्या. खलजीत सिंग (34), नितेश कुमार (20) आनी राहूल चौहान (27) अशीं तांचीं नांवां. तांचे कडल्यान सट्टेबाजी खातीर वापरिल्लो 1 लाख 70 हजारांचो म्हाल जप्त केलो.
बायलां क्रिकेट आयपीएल 23 फेब्रुवारी सावन सुरू आसा. ह्या क्रिकेट मॅचींचेर ऑनलायन सट्टेबाजी खेळपा खातीर दुबावितांनी साल्वादोर द मुंद हांगाचो बंगलो भाड्यान घेतिल्लो. फाटल्या तीन- चार मॅचींचेर ह्या बंगल्यांतल्यान सट्टेबाजी सुरू आशिल्ली. पर्वरी पुलिसांक हे विशीं म्हायती मेळ्ळी. सोमारा 4 तारखेक रॉयल चॅलेंजर्स बेंगळुरू आनी यूपी वॉरियर्स हांचे मदीं मॅच सुरू आशिल्ली. त्याच वेळार पुलिसांनी रातच्या वेळार ह्या बंगल्याचेर धाड घाली. ह्या वेळार दुबावीत सट्टेबाजी खेळताले. पुलिसांनी तिगांय दुबावितांक ताब्यांत घेतले आनी तांचे कडल्यान मोबायल फोन, लॅपटॉप, वायफाय राऊटर आनी हेर सामान मेळून 1 लाख 70 हजारांचो म्हाल जप्त केलो. दुबावितां आड गोंय दमण आनी दीव भौशीक जुगार कायद्याच्या कलम 3 आनी 4 खाला गुन्यांव नोंद केला.
पुलीस निरिक्षक राहुल परब हांच्या फुडारपणा खाला उपनिरिक्षक सीताराम मळीक, मंदार परब, हवालदार उत्कर्ष देसाय, सहादेव नायक, सिद्देश नायक, तुषार राऊत आनी नितेश गावडे ह्या पंगडान ही कारवाय केली. पुलीस अधीक्षक अक्षत कौशल आनी उपअधीक्षक विश्वेश कर्पे हांच्या मार्गदर्शना खाला पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
