भांगरभूंय | प्रतिनिधी
पणजी, प्रतिनिधी : राज्यांत रेंट ए कारचे अपघात वाडतूच आसात. तशेंच केन्ना केन्ना चूक नासून लेगीत रेंट ए कार घेतिल्ल्यांक थळाव्यांचे तिडकीक तोंड दिवचें पडटा. ताका लागून सरकारान रेंट ए कार वांगडा थळावो वाहन चालक दिवपाक सक्तीचें करचें अशी मागणी समाजीक कार्यकर्ते हृदयनाथ शिरोडकार हांणी केली. मंगळारा पणजे जाल्ले पत्रकार परिशदेंत ते उलयताले. ह्या वेळार महेश म्हांब्रे हाजीर आशिल्ले.
फाटल्या कांय वर्सां सावन रेंट ए कार आड थळाव्या वा हेर टॅक्सी चालकांचो संघर्ष वाडला. रेंट ए कार घेवपी पर्यटक दादागिरी करतात अशें थळाव्यांक दिसता. ताका लागून थळावे आतां प्रतिक्रिया दितात. पर्यटकांक हांगचे रस्ते, वन वे खबर नासता. ताका लागून रेंट रेंट ए कार वांगडा थळावो वाहन चालकूय दिवचो. चालकांक हांगचे सगळें खबर आशिल्ल्यान पर्यटक आनी थळाव्यां मदलो संघर्श खाळूं येता. तशेंच हाका लागून रोजगार निर्मितीय जातली, अशें शिरोडकार हांणी फुडें सांगलें.
राज्य सरकारान गोंयचे प्रमोशन चुकीचें पद्धतीन केलां. गोंयांत पर्यटक दर्या देगांचेर वयचे बदला कॅसिनो, सोरो आनी ड्रॅग्सा खातीर येतात. हें सगळें करून ते मस्ती करतलेच. ह्या सगळ्याक लागून बर्या दर्जाच्या पर्यटकांनी गोंयांत येवप बंद केलां. हाचेर सरकारान रोखडेच उपाय काडचे. सरकारान पर्यटन, पुलीस तशेंच पर्यटकां खातीर योग्य धोरण हाडपाक जाय. तशेंच प्रभावी कायदेय हाडपाक जाय.
म्हांब्रे हांणी म्हणलें, कांय दिसां आदीं नागपूर उच्च न्यायालयांतलो एक वकील वेर्णाच्यान रेंट ए कार घेवन वतालो. तांणी एका थळावे गाडयेक ओव्हरटेक केलें. त्या रागान सात ते आठ थळाव्यांनी ताका आडोवन मारलो. ते गाडयेचें लुकसाण केलें. गाडयेंत ताची गुरुवार बायल आनी ल्हान भुरगें आशिल्लें. मात राजकी फाटबळ आशिल्ल्यान हाचे आड पुलिसांनी कागाळ दाखल करपाक आनी अटक करपाक वेळ लायलो. असल्यो घडणुको बंद जावपाक जाय अशी मागणी तांणी केली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
