भांगरभूंय | प्रतिनिधी
वाळपय, प्रतिनिधी: माऊस पंचायत वाठारांत बिराडाक रावप्यांची म्हायती घर धनी सारकी दिना. तांची म्हायती लिपयता. ताका लागून पंचायतीच्या महसुलाचेर ताचो न्हयकारात्मक परिणाम जाता. देखून ज्या घरांनी लोक भाड्याक रावतात तांणी सात दिसां भितर पंचायती कडेन हे विशीं म्हायती दिवप गरजेचें. ना जाल्यार घरधनयांचेर दंडात्मक कारवाय करतले अशी शिटकावणी पंचायतीन दिल्या. हे विशींचो आदेश हालींच काडला. हो आदेश खरपणान पाळपाचे निर्देश दिल्यात.
म्हाऊस पंचायत वाठारांत नागवें, म्हाऊस, दाबें, झरमें, कोपर्डें ह्या गांवांचो आसपाव जाला. खुबश्या गांवांनी बिगर गोंयकार, कामगार आनी हेर लोक भाड्याक रावतात. हे विशींची म्हायती पंचायतीक दिवप गरजेचें. मात खुबशे घर धनी तांची म्हायती लिपयतना दिसतात. हाचो परिणाम पंचायतीच्या महसुलाचेर जातना दिसता. ताका लागून हे विशीं पंचायतीन आतां खर पावल उबारलां.
मजगतीं, हे विशीं सरपंच सोमनाथ काळे हांचे कडेन संपर्क केलो तेन्ना तांणी सांगलें, ह्या पंचायत वाठारांत आशिल्ल्या घरांनी भाड्याक लोक रावतात. तांची म्हायती दिवपाची मागणी जायते फावट केल्ली. मात हे मागणेक मान दिवंक ना. खुबशे घरधनी ही म्हायती लिपोवपाचो यत्न करतात. हे फाटभूंयेर सात दिसां भितर आपल्या भाडेकरूंची म्हायती पंचायतीक सादर करप गरजेचें. ना जाल्यार दंडात्मक कारवाय करतले. कोणाकूच माफ करचे नात. पंचायत हे विशीं खर भुमिका घेतली, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
