भांगरभूंय | प्रतिनिधी
नवी दिल्ली, खबरां संस्था ः तुमकां केन्ना सेक्सटॉर्शन, धमकी, ऑनलायन जॉब वा केवायसी आदी कडल्यान फटवणूकीचे कॉल, एसएमएस वा व्हाट्सएप संदेश आयलाच आसतलें. अशा सायबर गुन्यांवांचे कागाळीं खातीर दूरसंचार मंत्री अश्विनी वैष्णव हांणी काल संचार साथी पोर्टलाचेर दोन प्लॅटफॉर्म (चक्षू आनी डिजिटल इंटेलिजन्स प्लॅटफॉर्म म्हळ्यार डीआयपी) सुरू केल्यात. सायबर गुन्यांवाच्या संबंदीत डीआयपी कडेन कागाळ दाखल करची. आनी फोनाचेर सायबर फटवणूक वा गुन्यांव करपाचो दुबाव आयल्यार चक्षूचेर कागाळ करची.
कागाळ करपाची पुराय प्रक्रिया….
० sancharsaathi.gov.in हें संकेतथळ उगडात.
० नागरिक केंद्रीय सेवाचेर क्लिक करात.
० पयल्या बॉक्सांत सस्पेक्टेड फ्रॉड कम्युनिकेशन (चक्षू) दिसतले. ताचेर क्लिक करात.
० चक्षू नांवाची विंडो उगडटली. चड तपशीलां खातीर ताचे सकयल क्लिक करूंक शकतात.
० तुमचे कडेन संपर्क कसो केलो? एसएमएस, कॉल, व्हॉट्सअॅप अशे तीन पर्याय आसतले. तांतूतलो एक निवडात.
० दुसरो प्रस्न चर्चा विशयाचेर आसतलो. सेक्स्टॉर्शन, केवायसी आदी पर्याय दिसतले.
० मागीर स्क्रीन शॉट जोडचो. थंय फायल अपलोड करूं येता.
० कॉलाचो वेळ, दीस, संदेश वा व्हॉट्सअॅप ते नोंद करचे.
० कागाळीची चडांत चड मर्यादा 500 उतरां आसा.
० मागीर नांव आनी क्रमांक नोंद करात.
० मोबायल क्रमांक सत्यापना खातीर कॅप्चा टायप करचो. उपरांत व्हेरिफाय मोबाइल व्हाया ओटीपीचेर क्लिक करात.
हो प्लॅटफॉर्म अशें काम करतलो
मोबायल नंबर सक्रीय जातकच थळाव्या पुलिसांक ही म्हायती मेळटली. क्रमांक धनयाक दोन दिसां भितर परतून केवायसी करपाक सांगतले. आउटगोइंग बंद जातले. केवायसी जाली ना जाल्यार तपास एजन्सी कारवाय करतले. इंटरनॅट कॉलांचो आयपी ॲड्रेस मॅप करतले. मागीर लिंक, संदेश, बल्क कॉल ट्रेस करप सोंपें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
