भांगरभूंय | प्रतिनिधी
संवसारांतल्या खंयच्याय देशांत खंयच्याय प्रकारचें वाहन चलोवपाखातीर ड्रायव्हिंग लायसन्स गरजेचें. ड्रायव्हिंग लायसन्स नासतना गाडी चलयतना कोणूय सांपडल्यार दंडात्मक कारवाय करतात. भारतांतय ड्रायव्हिंग लायसन्स हो एक म्हत्वाचो दस्तावेज.
भारता सयत संवसारांतल्या सगळ्याच देशांनी ड्रायव्हिंग लायसन्स गरजेचें. दर वर्सा हजारांनी भारतीय नागरिक नोकरी, वेवसाय वा शिक्षणा खातीर परदेशांत वतात. परदेशांत गाडी घेतल्यार ती चलोवपाक त्या देशांतले ड्रायव्हिंग लायसन्स जाय पडटा. पूण, संवसारभरात कांय देशांनी भारतीय ड्रायव्हिंग लायसन्साक मान्यताय दिल्या. म्हणल्यार तुमचे कडेन भारतीय ड्रायव्हिंग लायसन्स आसल्यार त्या देशांनी तुमी मेकळेंपणान गाडी चलोवंक शकतात.
युनायटेड स्टेट्स ऑफ अमेरिका, ऑस्ट्रेलिया, कॅनडा, युनायटेड किंगडम, न्यूझीलंड, स्वित्झर्लंड, फ्रांन्स, दक्षिण आफ्रिका आनी स्वीडन ह्या देशांनी भारतीय ड्रायव्हिंग लायसन्स वैध आसा. ह्या खंयच्याय देशांत कामाक, शिक्षणाक वा पर्यटक म्हणून गेल्यार थंय गाडी चलोवंक मेळटा. पूण, ते खातीर तुमचे भारतीय ड्रायव्हिंग लायसन्स प्रादेशिक भाशे बदला इंग्लीश भाशेंत आसपाक जाय. तुमचे ड्रायव्हिंग लायसन्स हिंदी सयत हेर खंयच्याय प्रादेशिक भाशेंत आसल्यार ते परदेशांत अवैध थारतले.
तेच बरोबर परदेशांत वाहन चलोवपाखातीर त्या देशांनी हेर कांय कागदपत्रां पुराय करचीं पडटात. देखीक, अमेरिकेंत तुमकां तुमच्या लायसन्साची प्रत दिवची पडटली आनी I-94 हो फॉर्म व्हेरिफाय करचो पडटलो. तशेंच कांय देशांनी परमिट घेवचे पडटा. तेन्नाच भारतीय ड्रायव्हिंग लायसन्स सयत त्या देशांत गाडी चलोवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
