भांगरभूंय | प्रतिनिधी
कारवाय कळंगूटे आनी हणजूण वाठारांत: गोंय पुलिसांनी केली मजत
म्हापशें, प्रतिनिधी: झज्जर पुलीस, हरियाणा एसटीएफ आनी दिल्ली पुलिसांच्या विशेश पंगडान जोड मोहीम राबोवन नफे सिंह राठी खून प्रकरणांतल्या दोगा दुबावीतांक अटक केल्या. सौरव आनी आशिष अशीं तांचीं नांवां. ही कारवाय कळंगूटे आनी हणजूण वाठारांत केल्ल्यान ह्या कामांत गोंय पुलिसांनीय मजत केली.
हे विशीं चड म्हायती प्रमाण, सौरव आनी आशिष हे दोगूय शार्प शूटर्स. ते दोगूय दिल्लीच्या नांगलोई वाठारांत रावतात. ह्या दोगांयचो संबंद कपिल सांगवान उर्फ नंदू टोळये कडेन आशिल्ल्याचें उक्ताडार आयलां. हो गँगस्टर सध्या लंडनांत आसा. सौरव, आशिषाक आतां विमानान झज्जर हांगा व्हरतले. झज्जर पुलीस हेर दोग दुबावितांचो सोद घेतात.
भाजप फुडार्यां सयत १० जाणांचेर गुन्यांव दाखल
२५ फेब्रुवारीक बहादुरगड, झज्जर हांगा नफे सिंह राठी आनी तांचे कामगार जयकिशन हांचेर फारपेट करून तांचो खून केल्लो. कुटुंबियांच्याय जिवाक धोको आशिल्ल्याचेंय तांच्या घरच्यांनी सांगलें. राठी हांच्या कुटुंबीयांनी बहादूरगडचे भाजपचे आदले आमदार नरेश कौशिक, करमबीर राठी, रमेश राठी, कमल राठी, सतीश नंबरदार, गौरव, राहुल, बिरेंद्र राठी, संदीप, राजपाल शर्मा आनी अनवळखी हल्लेखोरां आड गुन्यांव दाखल केल्लो. उपरांत राठी हांच्या कुटुंबीयांक मारून उडोवपाच्यो धमक्योय आयिल्ल्यो. मात, ही धमकी दिवपी राजस्थानच्या दिलीप सिंह हाका झज्जर पुलिसांनी अटक केली. चवकशे उपरांत ताचो खंयच्याच गुंडा कडेन संपर्क आयिल्ल्याचें उक्तें जावंक ना. दिलीप सिंह सोशल मिडियाचेर कांय गुंडांक फॉलो करता हें कळ्ळें.
झज्जर पुलीस, हरियाणा एसटीएफ आनी दिल्ली पुलिसांच्या विशेश पंगडाच्या जोड कारवायेंत कपिल सांगवान उर्फ नंदू गँगच्या दोनूय शुटर्सांक गोंयच्यान धरल्यात. ह्या प्रकरणांत दोन शुटर्सांक आजूनय पुलीस सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
