भांगरभूंय | प्रतिनिधी
प्रवीण आर्लेकारः पोरस्कडें न्हंयबाग रस्त्याच्या दुरुस्ती कामाक सुरवात
भांगरभूंय । प्रतिनिधी
पेडणें: पेडणें मतदारसंघाची उदरगत हे आदीं जाय तितल्या प्रमाणांत जावंक ना. पूण हे खेपे डायनामीक मुख्यमंत्री म्हूण डॉ. प्रमोद सावंत हांच्या फुडारपणा खाला गोंयची सर्वांगी उदरगत चल्ल्या. रस्त्याचे कुशीक रावून रस्तो दुरुस्त करचो वा हॉटमिक्स करचो, अशी भीक मागून रस्तो जायना. ते खातीर फाटपुरवण करची पडटा. जे सल्लो दितात तांणी आपल्या मतदारसंघांत कसली उदरगत केल्या ती जाहीर करची. पेडणें मतदारसंघाची उदरगत करपाक आमदार ह्या नात्यान आपूण समर्थ आसा, अशें प्रवीण आर्लेकार हांणी सांगलें.
न्हंयबाग पोरस्कडे ते पंचायत सभाघरा मेरेनच्या रस्त्याचेर एक कोटी 99 लाख रुपया खर्च करून गटार वेवस्था आनी हॉटमिक्स डांबरीकरण करपाच्या कामाक आर्लेकार हांणी सुरवात करून दिली. ह्या वेळार ते उलयताले. ह्या वेळार पोरस्कडे अमेरे न्हंयबागची सरपंच प्रीती हळदणकार, उपसरपंच गडेकार, पंच एकनाथ तेली, पंच हळदणकार, पंच नीशा हळदणकार, कंत्राटदार, अभियंते आनी थळावे लोक व्हड संख्येन हाजीर आशिल्ले.
पोरस्कडे न्हंयबाग पुला पोंदच्या रस्त्याची चाळण जाल्ली. ताची दुरुस्ती करची हे खातीर थळाव्या लोकांनी दिसाळ्यां वरवीं आवाज काडिल्लो. सूर्यकांत चोडणकार, राजन घाटे, अडवालपालकार आनी हेर कांय समाज वावुरप्यांनी रस्त्याचे कुशीक हातांत कट्ट्यो घेवन रस्त्याचे दुरुस्ती खातीर भीक मागपाचो आगळो वेगळो उपक्रम चालीक लायिल्लो.
पेडणें मतदारसंघांतल्या रस्त्याचीं आवतिकाय आतांच जावंक नाशिल्ली. आपूण आमदार नाशिल्लो तेन्नाय रस्त्याची चाळण जाल्ली. त्या वेळार वेंचून आयिल्ल्या लोकप्रतिनिधीन योग्य पद्दतीन नियोजन करून उदरगत करूंक नाशिल्ल्यान रस्त्याची स्थिती भिरांकूळ जाल्ली. पूण मुख्यमंत्री डॉ. प्रमोद सावंत हांच्या आदारान तशेंच तांचे दूरदिश्टीक लागून ह्या रस्त्याचे उदरगतीक चालना मेळटा, अशें आमदार आर्लेकार हांणी सांगलें.
प्रीती हळदणकार हांणी सांगलें, ह्या रस्त्याची स्थिती भिरांकूळ जाल्ली. ह्या रस्त्या विशीं आमदार आर्लेकार हांकां मेळून ह्या रस्त्याची दुरुस्ती आनी डांबरीकरण करपाची विनवणी केल्ली. तांणीय सरकार दरबारांत यत्न केल्ल्यान ह्या रस्त्याचें काम हातांत घेतलां.
नीशा हळदणकार हांणी सांगलें, खंयच्याय आमदाराचेर रोखडीच टिका करची न्हय. टिका करचे परस उदगतीच्या कामा खातीर सुचोवणी करात. सगळ्यांक वांगडा घेवन उदरगत करुंया. आमदार आर्लेकार उदरगतीचीं कामां करतात. दर दिसा कामांक चालना मेळटा, अशें एकनाथ तेली हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
