भांगरभूंय | प्रतिनिधी
मडगांव, प्रतिनिधी : सां जुझे दी आरीयाल ग्रामसभेंत आयज छत्रपती शिवरायांच्या पुतळ्याच्या विशयाचेर चर्चा जाली. ह्या वेळार ग्रामस्थांनी छत्रपती शिवरायांचो पुतळो उबारपाक आमचो मात पसून विरोध ना, मात ज्या बेकायदेशीरपणान पुतळो उबारला त्या बेकायदशीर कामांक खर विरोध आशिल्ल्याचें सांगलें. लाठीचार्जाक निशेध करीत ग्रामस्थां वयले गुन्यांव फाटीं घेवचे. तशेंच गांवची शातिकाय इबाडप्यांचेर खर कारवाय करची, असो थाराव ग्रामसभेंत घेतलो.
आयतारा सकाळीं सां जुझे दी आरीयाल ग्रामसभा पंचायतीच्या सभाघरांत जाली. हे ग्रामसभेक पंचायत मंडळा सयत आमदार क्रुझ सिल्वा हाजीर आशिल्ले. हे ग्रामसभेंत सां जुझे दी अरीयाल गांवांतल्या प्रदुशणाच्या विशयाचेर चर्चा जाली. उद्देगीक वसणुकेंतल्यान वारें आनी उदकाचें प्रदुशण जाता. आदीं गोंय प्रदूशण नियंत्रण महामंडळा कडल्यान चाचणी केल्या. प्रदुशणाचो मुद्दो घेवन ग्रामपंचायत हरीत लवादांत याचिका दाखल करतली. ताका लागून ग्रामसभेंत प्रदुशणा आड थाराव घेतला. एमआरएफ शेडी खातीर हाचे पयलीं एका जाग्याची निवड केल्ली. आतां ताचे बदला दुसर्या जाग्याचो पर्याय दवरला. बीडिओ कडल्यान तो जागो निमाणो करपा विशीं निर्णय घेतले, अशें स्पश्ट केलें.
ग्रामसभेंत छत्रपती शिवरायांचो पुतळो उबारपा विशी चर्चा जाली. खाजगी जाग्यार जो पुतळो उबारला, ताची जापसालदारकी त्या जाग्याच्या धनयाक दिवची. शिवजयंती दिसा मंत्र्यां मुखारूय ग्रामस्थांनी शिवरायांच्या पुतळ्याक न्हय, तर परवानगे बगर पुतळो उबारिल्ले खातीर विरोध केल्लो, अशें सांगिल्लें. जाग्याच्या धनया कडल्यान ९ फेब्रुवारीक सिमेंटाचो चौथरो उबारपाक परवानगी दिवपाचो अर्ज पंचायतींत केलो. १५ तारखेक जाल्ले बसकेंत पळोवणे वेळार निर्णय घेवपाचें थारिल्लें. मात पंचायतीक कुशीक दवरून पुतळो उबारिल्ल्यान हो बोवाळ जाला अशें फ्रेडी ट्राव्हासो हांणी सांगलें. तशेंच बेकायदेशीर गर्दी भायल्या लोकांनी केल्ली. तांचेर गुन्यांव नोंद करपाची मागणी ह्या वेळार केली. हे विशीं परत ग्रामसभेंत राज्यपाल, मुख्यमंत्री, जिल्होधिकारी हांकांय पत्र धाडटले अशें सांगलें.
मजगतीं, ग्रामसभेंत शिवरायांच्या पुतळ्याच्या विशयाचेर सगळी चवशी आनी फुडल्या घडामोडींचेर लक्ष दवरपाक पांच जाणांची समिती स्थापन करपाचें थारलें. जाग्याच्या धनयान पंचायती कडेन केल्ल्या पत्रा प्रमाण सोमारा ह्या जाग्याची पळोवणी करपाचें थारलें. तशेंच बीडिओं कडेन पुतळ्या विशींच्या मुद्द्यांचेर चर्चा करपाक विशेश बसकेचें आयोजन करपाची मागणी बीडिओंकडेन केल्या.
गुन्यांव फाटीं घेवपाचे यत्न करता: आमदार सिल्वा
मुख्यमंत्री डॉ. प्रमोद सावंत हांचे कडेन चर्चा केले उपरांत तांणी ग्रामस्थां वयले गुन्यांव फाटीं घेवपाक सहकार्य करपाचें आस्वासन दिलां. तशेंच गांवांत शांतताय राखपाची पुराय जापसालदारकी सरकारान घेवची, अशें सांगिल्लें. तशी पुलिसां कडेनूय आमी चर्चा केल्या, अशें आमदार क्रुझ सिल्वा हांणी सांगलें. ह्या वेळार जाल्ल्या लाठीमाराचो ग्रामस्थांनी निशेध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
