भांगरभूंय | प्रतिनिधी
पुर्तुगालाच्या भारतांतल्या दुतावासाचो प्रस्ताव
पणजी, बातमीदार : भारतांतल्या दोट्टी नागरिकत्वाच्या बोवाळा उपरांत, आतां पुर्तुगेज पासपोर्ट मेळोवपाची इत्सा आशिल्ल्यांक निर्शेवणी हाडपी खबर मेळ्ळ्या. भारतांतल्या पुर्तुगालाच्या दूतावासांतल्यान आयिल्लो प्रस्ताव मान्य जालो जाल्यार पुर्तुगेज सरकार आपले नागरिकत्वाचे निकश खर करपाक शकता. देखून तो पासपोर्ट मेळोवपाचे जायत्या जाणांचें सपन उध्वस्त जावपाक शकता.
पुर्तुगेज खबरां संकेतथळा प्रमाण, 20 डिसेंबर 1961 पयलीं जल्मल्ल्या गोंयकारांक तशेंच तांच्या वंशजांक नागरीकत्व दिवपाचें सद्याचें धोरण पुर्तुगालान बंद करचें, असो प्रस्ताव दूतावासान आपल्या सरकाराक धाडला. मात अचकीत अशें जाहीर करपा फाटलें खरें कारण अजून कळूंक नासलें तरी दोनूय देशां मदले द्विपक्षीय संबंद सुदारपाची आनी चालू आशिल्ल्या दोट्टी नागरीकत्वाचेर आशिल्लो कायदेशीर वाद सोडोवपाक हें पावल उखल्लां, अशें कळटा.
नागरीकत्व दिवपाची प्रक्रिया चालू दवरप आनी ती नेमकी आनीक कितल्या काळा खातीर हांचे संबंदी पुर्तुगाल सरकारान राजकी निर्णय घेवचो पडटलो अशें एका अधिकाऱ्यान सांगलें. आफ्रिका, आशिया आनी लॅटीन अमेरिकेंतल्या आदल्या वसणुकांतल्या नागरिकांक नागरिकत्व दिवपा खातीर पुर्तुगालान अजून तरी कसलीच मुजत थारायल्ली ना अशेंय तांणी सांगलें.
पुर्तुगेज सरकारांतले अधिकारीय मान्य करतात की पासपोर्टा खातीर अर्ज करपी चडशा अर्जदारांक, (सगळ्याच न्हय) युरोपीयन खंडांतल्या गिरेस्त वाठारांनी रोजगार संद मेळोवपा खातीर कशे तरी हांगा येवपाचे आसतात. पोटा खातीर पासपोर्ट घेवन हांगा येवप हें तांचें मुखेल ध्येय आसा.
पुर्तुगेज नागरीकत्व मेळोवपी खंयच्याय मनशाक भारतीय कायद्या प्रमाण, आपलें भारतीय नागरीकत्व सक्तीन सोडचें पडटा. तशेंच दोट्टी राश्ट्रीयताय आशिल्ल्यांक भारतीय पासपोर्ट रद्द करपाच्या वेळार बऱ्याच आव्हानांक तोंड दिवचें पडटा, हें आमकां खबर आसा अशें अधिकाऱ्यान सांगलें.
2011 वर्सा सावन पुर्तुगेज राश्ट्रीयताय आशिल्ल्या 1,968 गोंयकारांचीं नांवां राज्याच्या वेंचणूक वळेरेंतल्यान काडून उडयल्यात. भारता कडले संबंद बरे सुदारल्यार रिणाच्या संकश्टाचो परिणाम जाल्ल्या पुर्तुगालाक फायदो जावंक शकता, अशें संकेतथळार म्हणलां. पुर्तुगालांत जल्म नोंद केल्ल्या कितल्याशाच हजार गोंयकारांक थाकाय दिवपा खातीर गोंय सरकाराचेर चेंपण वाडत आसा.
जायत्या जाणांक पयलींच भारतीय नागरीकत्व रद्द करपाची गरज आशिल्ल्यान व्हिसा आनी ओव्हरसीज सिटीजन ऑफ इंडिया (ओसीआय) दर्जो मेळोवपाक गुंतागुंत निर्माण जाल्या.
दोन म्हयन्यांच्या वादा उपरांत मुख्यमंत्री प्रमोद सावंत हांणी फाटल्या म्हयन्यांत दिल्लींत परराश्ट्र राज्यमंत्री मीनाक्षी लेखी हांचे वांगडा बसका घेवन हो प्रस्न सुटावो करपाची मागणी केल्ली.
मंत्री आलेक्स सिक्वेरा हांचे वांगडा, पासपोर्ट रद्द करतकच ओसीआय दर्जो मेळोवपाक येवपी आव्हानां आनी व्हिसा प्रस्नांचेर चर्चा केली. बसकेची सगली म्हायती प्रसार माध्यमांक मेळूंक नासली तरी मुख्यमंत्र्यान सोशल मिडियाचेर वचून चर्चे वेळार जाल्ली प्रगती लोकांक कळयली.
फ्रेंच सरकाराचोय निर्णय
फ्रेंच सरकारान हिंद म्हासागरांतल्या मेयोटे जुंव्यां वयल्या स्थलांतरीतांच्या भुरग्यांक नागरिकत्व दिवपा संबंदीची संविधानांतली तरतूद दुरुस्त करपाचो निर्णय घेतला. स्थलांतर आडावपाक तांणी हो निर्णय घेतिल्ल्याचें कळटा. मायोटे हो मादागास्कर आनी आफ्रिका खंडां मदलो एक जुंवो.
दोन जुंवे आशिल्ल्या मॅयोटे शारांत जल्मल्ल्या स्थलांतरीत लोकांचीं भुरगीं आतां आपोआप फ्रेंच नागरिक जावचीं नात अशें फ्रान्साच्या आंतर वेव्हार मंत्र्यान जाहीर केलां. देखून मेयोटांतल्या कोणाचोय आवय- बापूय जर फ्रेंच ना जाल्यार ताका आतां फ्रेंच नागरीक जावपाक मेळचो ना. फ्रांन्स सद्या आवय- बापुय आनी जल्मस्थान ह्या दोनूय माध्यमांतल्यान त्या मनशाक आपलें नागरीकत्व दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
