भांगरभूंय | प्रतिनिधी
नवी दिल्ली, खबरां संस्था: गृह मंत्रालयान बनावट पुलीस अधिकार्यां विशीं लोकांक शिटकावणी दिल्या. ह्या दिसांनी नवे तरेचीं फटवणूक सुरू जाल्या. घोटाळे करपी पुलीस वा सरकारी अधिकारी अशें नाटक करतात आनी तुमच्या नांवान एक पार्सल जप्त केलां आनी तातूंत बेकायदेशीर माल आसा अशें सांगतात. हाचे उपरांत कांय प्रस्नांच्यो जापो विचारतात, जातूंत वापरप्यांचो वयक्तीक तपशील विचारतात आनी ताचो मागीर ते आपलो फायदो करतात.
तुमचे वांगडाय असलीं फटींगपणां जाल्यांत जाल्यार जतनाय घेवची. असल्या खंयच्याय फोन कॉलाचेर विस्वास दवरचो न्हय वा तुमचो वयक्तीक तपशील वांटचो न्हय. ह्या तपशीलांत तुमच्या बँकेच्या तपशीलांचोय आस्पाव जाता. तशेंच अशे दुबावीत फोन कॉल आयल्यार बेगोबेग सायबर पुलिसांक तें विशीं कळोवचें.
ह्या कुरियर घोटाळ्याची म्हायती सोशल मिडिया अकावंट सायबर दोस्ट ह्या खात्याचेर दिल्या, जी गृह मंत्रालय हाताळटा.
फटोवपी पुलीस वा एनसीआरबीच्या अधिकारी आशिल्ल्याचें सांगतात. तुमच्या पार्सलांत/कुरियरांत बेकायदेशीर वस्तू मेळ्ळ्यात अशे हे लोक फट मारतात.
अशे परिस्थितींत आमी कितें करचें?
पुलीस/एनसीआरबी कडल्यान अनपेक्षीत फोन कॉलां पसून सावधान रावचें.
फोन करपी खरो काय बनावट आसा हें स्वता सोदून काडपाचो यत्न करात.
तुमची वयक्तीक वा बँके संबंदीत म्हायती फोनाचेर दिवची न्हय.
तशेंच अशा प्रकरणां विशीं तुमच्या इश्टांक आनी कुटुंबाक सावधान करात.
तुमकां असो कॉल आयल्यार तुमी रोखडीच सायबर गुन्यांव संकेतथळार https://cybercrime.gov.in चेर कागाळ दाखल करूंक शकतात. तशेंच १९३० क्रमांक डायल करूनय अशा प्रकरणांची म्हायती दिवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
