भांगरभूंय | प्रतिनिधी
म्हापशें: हडफड्यां हणजूणें पुलिसांनी शिंदळकी वेवसाया आड कारवाय करून दोगां चलयांची सुटका केली. ह्या प्रकरणांत पश्चीम बंगालांतलो दुबावीत राणा मिआह (240 आनी निलिमा यास्मीन (31) ह्या दोगा दलालांक अटक केली.
शुक्रारा सांजे उसरां पुलिसांनी ही कारवाय केली. हडफडेंच्या थंडर वर्ल्ड आस्थापना लागसार शिंदळकी वेवसायांत घुस्पावचे खातीर चलयांक हाडटले, अशी म्हायती मेळिल्ली. ते प्रमाण पुलिसांनी सांपळो रचलो. थारायिल्ल्या वेळार दोगूय दुबावीत दोगां चलयांक घेवन येताच पुलिसांनी तांकां धरले. चवकशी केले उपरांत दोनूय चलयांची सुटका करून तांकां मेरशेच्या सुदारघरांत धाडलीं. जाल्यार दुबावीत राणा आनी निलिमा हांचे आड शिंदळकी वेवसाय प्रतिबंधक कायद्या खाला गुन्यांव नोंद करून तांकां अटक केली.
दुबावितांक म्हापशें न्यायालयान चार दिसांची पुलीस कोठडी फर्मायल्या. पुलीस निरिक्षक प्रशल नायक देसाय, कॉन्सटेबल महेंद्र मांद्रेकार, संदेश पेडणेंकार, कृष्णा बुगडे, रामा परब, सत्येंद्र नास्नोडकार, रोशनी कांबळी, प्रतिज्ञा नायक, प्रतिक्षा नायक आनी अक्षता मळीक ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
