भांगरभूंय | प्रतिनिधी
नवी दिल्ली, खबरां संस्था ः सोशल मिडियाचे जशें फायदे आसात तशें लुकसाणय आसा. सोशल मिडियाचेर आपूण चली आसा अशें सांगून एके चलये बरोबर इश्टागत केली. तिचो विस्वास मेळयलो आनी उपरांत तिचे खाजगी फोटोय मेळयले आनी उपरांत तेच फोटो सोशल मिडियाचेर शेअर करपाची धमकी दिवन चलयेक ब्लॅकमेलय केली. ह्या प्रकरणांत 27 वर्सां पिरायेच्या आरोपीक उत्तराखंडांतल्यान अटक केल्याचे दिल्ली पुलिसांनी सांगलें.
नेमकें प्रकरण कितें?
सुभान अली अशें आरोपीचे नांव जावन आसा. तो उत्तराखंडांतल्या उधमसिंहनगरांतल्या बाजपूर शारांत रावता. ताणें चलयेच्या नांवान सोशल मिडियाचेर फेक अकाउंट उगडिल्लें. तेच वेळार ताची पिडित चलये कडेन वळख जाली. ल्हवू ल्हवू तिचो विस्वास मेळयलो आनी ताणें तिचे कडेन इश्टागत केली. उपरांत ‘ट्रूथ अँड डेअर गेम’ च्या नांवान तिचे खाजगी फोटो आनी व्हिडियो शेअर करपाचें डेअर दिलें. ते उपरांत आरोपी सुभान हांणे त्या फोटोंचो गैरवापर करून पिडित नेण्टे चलयेक धमकायले.
खबरां प्रमाण, पिडित चलयेक शाळेंतल्या ऑनलायन वर्गा खातीर स्मार्टफोन वापरपाक दिल्लो. एक दीस चलयेच्या आवयन मोबायलाचेर चलयेचे खाजगी फोटो आनी व्हिडियो पळयले आनी चलये कडेन चवकशी केली. ते वेळार चलयेन घडिल्लो सगळो प्रकार सांगलो. उपरांत 20 फेब्रुवारीक चलयेच्या बापायन पुलिशेंत कागाळ दाखल केली. आरोपी सुभान आपले चलयेक त्रास दिता आनी ब्लॅकमेल करता असो उल्लेख तांणी कागाळींत केलो. तशेंच सोशल मिडियाचेर चलयेचे खाजगी फोटो आनी व्हिडियो घालून व्हायरल करपाची धमकी दिल्ल्याचें चलयेच्या बापायन पुलिसांक सांगलें.
आरोपी सुभान सोशल मिडियाचेर चली आशिल्ल्याचे नाटक करून फेक अकाउंट उगडटालो आनी चलयां कडेन इश्टागत करुन तांची फटपणूक करतालो अशें चवकशेंतल्यान स्पश्ट जाले. सोशल मिडिया आयडी मोबायल नंबराकडेन जोडिल्लो आशिल्लो, जो उत्तराखंडांतल्या उधमसिंह नगरांत सक्रीय दिसतालो. हांचेच वरवीं पुलिसांनी 24 फेब्रुवारीक आरोपींक उत्तराखंडांतल्यान अटक केली. तशेंच पुलिसांनी ताचो मोबायल जप्त केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
