भांगरभूंय | प्रतिनिधी
गुजरात, खबरां संस्था ः अहमदाबादच्या चांदलोडिया वाठारांत शार उदरगत नियोजना खाला रस्तो बांदपाचो आसा. हे खातीर ह्या रस्त्या वयलें देवूळय मोडून उडयतले. ह्या निर्णया आड 93 कुटुंबांनी गुजरात उच्च न्यायालयांत याचिका दाखल केल्या. ह्या प्रकरणाची सुनावणी घेतना मुखेल न्यायाधीश सुनीता अग्रवाल हांणी याचिकादारांक सांगलें, की ‘अशे भावनीक मुद्दे मुखार हाडून लोक ब्लॅकमेल करतात. देवळाच्या माद्यमांतल्यान अशे जागे बळकावपाचो यत्न देशभरांत चालू आसात.’
एका इंग्लीश दिसाळ्याचे खबरे प्रमाण, शार नियोजन येवजणे खाला भौशीक रस्तो बांदपा खातीर एक देवूळ मोडपाचे आशिल्ले. ताचे आड 93 कुटुंबांनी याचिका दाखल केली. पूण उच्च न्यायालयाच्या एका खंडपिठान ही याचिका न्हयकारली. ते उपरांत कुटुंबान परत एक फावट उच्च खंडपिठा मुखार याचिका दाखल केली. अहमदाबाद महानगरपालिकेन खंयचेच देवूळ मोडचे ना अशें उतर दिल्लें. तरी लेगीत रस्त्याच्या कामां खाला येवपी देवूळ वांचोवपा खातीर ह्या कुटुंबांनी न्यायालयांत संपर्क सादलो. हें देवूळ बांदपाक खूब कश्ट घेतल्यात आनी आमच्यो भावना ताचे कडेन जोडल्यात अशेंय ह्या लोकांनी सांगलें.
याचिकाचेर सुनावणी जाले उपरांत मुखेल न्यायाधीश सुनीता अग्रवाल हांणी सांगलें, अशे तरेचे भावनीक मुद्यांक मुखार करून लोक कांय निर्णय घेवपाक लायतात. तुमी देवूळ मुखार करुन भौशीक सुवात मेळोवपाचो यत्न करतात आनी देशांतल्या जायत्या सुवातींनी देवळा वरवीं जमीन हडप करतात.
ज्या जमनीचेर देवूळ आसा ती जमीन याचिकादारांची ना. तुमी भावनांचेर आदारून देवूळ वाचवपाचो यत्न करतात. तुमी बांदकामा भायर देवळाचो तकटो लायतले आनी तें देवूळ आसा देखून संरक्षण दियात अशेंय सांगतलें. अशें तरेचे भारतांत जमनी हडप करपाचे जायते प्रकार घडतात, अशें म्हणून न्यायालयान हाचेर तिडक उक्तायली.
मजगतीं, मुखेल न्यायाधीश आनी न्यायाधीश अनिरुद्ध मयी हांणी बांदकामाक तात्पुरती सुटका दिली आनी फुडली सुनावणी 14 मार्चाक जातली अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
