भांगरभूंय | प्रतिनिधी
मतदारांनी सुचोवण्यो बरोवन दिवच्यो : खासदार तानावडेचो उलो
पणजी, बातमीदार ः लोकसभा वेंचणुकेच्या जाहिरनाम्या खातीर भाजपाची फाल्या सावन (3 मार्च) 15 मार्च मेरेन ‘संकल्प पत्र रथ यात्रा’ सुरू जातली. हांतूत भाजपाच्या जाहिरनाम्या खातीर मतदारां कडल्यान सुचवण्यो मागयतले अशीं म्हायती भाजपा प्रदेशाध्यक्ष खासदार सदानंद शेट तानावडे हांणी दिली.
शेनवारा पणजेंत जाल्ले पत्रकार परिशदेंत ते उलयताले. हे वेळार मुख्यमंत्री डॉ. प्रमोद सावंत, पर्यटन मंत्री रोहन खंवटे आनी जलस्त्रोत मंत्री सुभाष शिरोडकार हाजीर आशिल्ले.
देशभर भाजपा कडल्यान संकल्प पत्र मोहीम चालीक लायतले. गोंयांत मडगांव सावन ही मोहीम सुरू जातली. संकल्प पत्र रथ राज्यांतल्या सगळ्या मतदारसंघांतल्यान भोंवडी करतलें. ह्या वेळार वेगवेगळ्या क्षेत्रांतल्या लोकां कडल्यान भाजपाच्या जाहिरनाम्या संबंदी अपेक्षा आनी सुचोवण्यो घेतले. हाचे खातीर लोकांक एक कार्ड दितले. ताचेर तांणी सुचोवण्यो बरोवन दिवच्यो. राज्यभरांतल्यान 50 हजार सुचोवण्यो घेवन त्यो दिल्लींतल्या मुखेल कार्यालयांत धाडटले अशें तानावडे हांणी ह्या वेळार सांगलें.
‘मॅनीफेस्टो यात्रा – सुझाव आपका, संकल्प हमारा’ प्रमाण ही मोहीम देशभर चालीक लायतले. भाजपाचो जाहिरनामो हो पक्षाचो न्हय तर पुरायपणान ‘लोकांचो जाहिरनामो’ आसतलो. मतदारां कडल्यान पत्रां वरवीं, मोदी अॅप, मिस्ड कॉल वा हेर माध्यमांतल्यान तांचे विचार आनी सुचोवण्यो मागयतलें. बायलां, तरणाट्यांनी, शेतकारांनी जाहिरनाम्या खातीर आपल्यो सुचोवण्यो दिवच्यो. भाजपान 2014 आनी 2019 च्या जाहिरनाम्यातलीं सगलीं आश्वासनां पुराय केल्यांत. तशेंच 2024 वर्साच्या जाहिरनाम्यातलीं सगळीं आश्वासना पुराय जातलीं अशें मुख्यमंत्री डॉ. सावंत हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
