भांगरभूंय | प्रतिनिधी
मडगांव, प्रतिनिधी ः काणकोण- मडगांव राष्ट्रीय म्हामार्गाचेर जाल्ल्या दोन ट्रकांच्या अपघातांत जखमी जाल्लो ड्रायव्हर उमेश तलवार (23, बेळगांव-कर्नाटक) हाका उपचारा वेळार मरण आयलें. ह्या अपघातांत दुसऱ्या ट्रकाचो ड्रायव्हर आनी वाहक जखमी जाल्यांत आनी तांचेर उपचार सुरू आसात. हो अपघात काल रातीं जालो.
मेळिल्ले म्हायती प्रमाण, शुक्रारा रातीं काणकोण- मडगांव राष्ट्रीय म्हामार्गाचेर कुंकळ्ळी पुलीस स्टेशनाच्या खड्डे वाठारांत दोन ट्रकांचो मुखारल्यान एकामेकांक धपको बसलो. ह्या भिरांकूळ अपघातांत उपचारा वेळार एका ट्रक चालकाक मरण आयिल्ल्याची म्हायती कुंकळ्ळी पुलिसांनी दिल्या. काणकोणांतल्यान मडगांवाचे वटेन लांकडी माल व्हरपी ट्रक आनी मडगांवांतल्यान काणकोण वटेन बॉक्सायट माल व्हरपी ट्रकां मदीं खड्डे-केपे हांगा मुखारल्यान एकमेकांक धपको दिवन अपघात जालो. ह्या अपघातांत दोनूय ट्रकांचे फुडल्यांच्यान लुकसाण जाले. तांतूत ट्रक चालक आडखळून उरले. उपरांत अपघाताची म्हायती कुंकळ्ळी पुलीस आनी कुंकळ्ळीच्या उजो पालोवपी दळाक दिले उपरांत ते घडणूक सुवातेर आयले. हाजीर आशिल्ल्या नागरिकांनी आनी उजो पालोवपी दळाच्या जवानांनी ट्रकांत आडखून उरिल्ल्यांक भायर काडले. ह्या अपघाताक लागून म्हामार्गाचेर सुमार एक वर येरादारीची कोंयडी जाल्ली.
मजगतीं, कर्नाटकाक बॉक्सायट व्हरपी ट्रकाचो ड्रायव्हर उमेश तलवार हाका गंभीर अवस्थेंत हॉस्पिटलांत उपचारा खातीर दाखल केल्लो. पूण, उपचारा वेळार ताका मरण आयलें. दुसऱ्या ट्रकाचो ड्रायव्हर आनी वाहक दोगूय जखमी जाल्यात आनी तांचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
