‘रेंट अ कॅब’ जीपीन दिलो दोन स्कुटरींक धपको, पर्यटक आशिल्ले ‘टायट’
भांगरभूंय | प्रतिनिधी
दिल्लीच्या पांच पर्यटकांचे हरमल दर्यादेगेर धुमशेण
हरमल ः फाटल्या म्हयन्यांत हरमला ‘हीट अँड रन’ अपघातांत दोन चुलत भावांक मरण आयल्लें. पर्यटकांचे गाडयेन अचकीत दार उक्तें केल्ल्यान ताका आपटून ते भाव ट्रका पोंदा पडिल्ले. उपरांत पर्यटक पळून गेल्ले. हें प्रकरण ताजें आसतनाच काल रातीं ‘हीट अँड रन’ ची अजून एक घडणुक घडली.
‘रेंट अ कॅब’ वेवसायिका कडल्यान थार जीप भाड्यान घेवन काल रातीं सुमार 11 वरांचेर हरमल दर्यादेगेर आग्राच्या (दिल्ली) पांच पर्यटकांनी धुमशेणां घालीं. ह्या पर्यटकांनी दोन स्कुटरींक धपको दिलो उपरांत थळाव्या लोकांनी तांकां आडायले. हे घडणुकेची म्हायती मांद्रे पुलिसांक दिली. उपरांत पुलिसांनी येवन जिप सयत पर्यटकांक ताब्यांत घेतले.
चड म्हायती प्रमाण, कांदोळेच्यान भाड्यांन घेतिल्ले जीए- 03 एएच- 5746 क्रमांकाची थार जीपांतल्यान आग्राचे (दिल्ली) पांच पर्यटक काल सांजवेळार हरमल दर्यादेगेर आयले. उपरांत मजा मस्ती करून ते रातच्या सुमार 11 वरांचेर परत कांदोळे वचपाक भायर सरले. ह्या पर्यटकांनी मुखेल रस्त्यार पाव मेरेन दोन स्कुटरींक धपको दिलो. उपरांत तांकां मजत करचें बदला तांणी थंयच्यान पळून वचपाचो यत्न केलो. हो प्रकार पळोवन थळाव्या लोकांनी रोखडोच फाटलाव करून जीप आडायली. त्या वेळार हें पर्यटक सोऱ्याच्या नशेंत सामके टायट आशिल्ल्याचे दिसलें. तांणी रोखडीच पुलिसांक ही म्हायती दिली. पुलीस रोखडेच घडणूक सुवातेर हजर जाले. हे खेपे स्कुटर चलोवप्यांक भरपाय दिवपाक पर्यटक तयार आशिल्ल्यान तांणी कागाळ दाखल करूंक ना. हें पर्यटक सोऱ्याच्या नशेंत आशिल्ल्याचो दुबाव आशिल्ल्यान जीप सयत पुलिसांनी तांकां ताब्यांत घेतले. आयज सकाळीं तांची वैजकी तपासणी केल्ली तेन्ना तें सोऱ्याचे नशेंत आशिल्ल्याचें स्पश्ट जालें. सोरो पियेवन गाडी चलोवपाच्या प्रकरणांत पुलिसांनी तांचेर दंडात्मक कारवाय केली. मांद्रे पुलीस स्टेशनाचे उपनिरिक्षक अनिल पोळेकार हांच्या मार्गदर्शना खाला कल्पेश नायक हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
