भांगरभूंय | प्रतिनिधी
वागातोरचो प्रकार; 10 लाखांक तोपी, एका दुबाविताक धरलो
भांगरभूंय । प्रतिनिधी
म्हापशें: दुपेट पयशांची आशा दोगा तरणाट्यांक म्हारग पडली. ह्या प्रकरणांत दुबावितांनी तांचे कडले 10 लाख रुपया फारायले. हो प्रकार वागातोर वाठारांत घडलो. ह्या प्रकरणांत हणजूणें पुलिसांनी दुबावीत मोहम्मद फिरसत शमशेर (31. रा. नौझियाबाद, उत्तर प्रदेश) हाका अटक केल्या.
हो प्रकार बिरेस्तारा रातच्या 9.30 वरांच्या सुमाराक चिवार वागातोरच्या श्री राष्ट्रोळी देवळांत घडलो. ह्या प्रकरणांत विशाल वेळगेंकार (वेळगें दिवचल) हाणें पुलिशेंत कागाळ दाखल केल्या.
फिर्यादी वेळगेंकार हाणें सांगिल्ले प्रमाण, एका म्हयन्या आदीं एक फोन आयिल्लो. त्या अज्ञात मनशान जादूटोणा करून पयशे दुपेट करून दिता, पूण ते खातीर 10 लाखां परस चड रुपयांची रक्कम जाय अशें सांगलें. फिर्यादीन हणजूणेंचो आपलो इश्ट मोहिंदर गोवेकार हाका ही खबर सांगली. पूण आपले कडेन इतले पयशे नात, अशेंय ताणें इश्टाक सांगलें. ताका लागून आमी ही रकम एकठांय करुंया अशें गोवेकार हाणें वेळगेंकाराक सांगलें. ते प्रमाण दोगांनीय 10 लाख रुपया एकठांय केले. तातूंतलो एक लाख वेळगेकार हाचो जाल्यार 9 लाख रुपया गोवेकार हाचे आशिल्ले.
रकम एकठांय जाले उपरांत फिर्यादीन दुबावितांक वागातोरा बिरेस्तारा 29 फेब्रुवारीक आपयले. दुबावीत योगराज भास्कर साळवे आनी मोहम्मद शमशेर हे दोगूय आयले आनी वागातोरच्या जुली जॉली हॉटेलांत रावले. थंय तांणी हॉटेलाचे कुडींत फिर्यादी आनी ताच्या इश्टाक आपोवन रकम दुपेट करचे खातीर जादूटोणा केलो.
उपरांत रातच्या 9.15 वरांच्या सुमाराक दुबावितांनी फिर्यादी आनी ताच्या इश्टाक चिवारच्या श्री राष्ट्रोळी देवळांत फुडलो विधी करपाच्या निमतान व्हेले. थंय दुबावीत भास्कर साळवे हाणें नदर चुकोवन 10 लाख रुपया आशिल्ली बॅग घेतली आनी दोनूय दुबावितांनी थंयच्यान पळ काडलो. देवळा मुखार महाराष्ट्रांत नोंदणी आशिल्ल्या स्कॉर्पियो मोटारींतल्यान दुबावीत साळवी पळून गेलो. ते मोटारींत चालक आनी आनीक एकलो अशे दोग जाण आशिल्ले. पूण ते गाडयेंत चडचे आदींच दुबावीत मोहम्मद शेमशेर हाका त्या दोगा तरणाट्यां सयत देवळांतल्या लोकांनी धरले आनी बरेच बडयले.
घडणुकेची म्हायती मेळटाच हणजूणें पुलिसांनी घडणुकेचे सुवातेर वचून लोकांचे तावडेंतल्यान दुबाविताक ताब्यांत घेतलो. उपरांत दुबाविता आड गुन्यांव नोंद करून ताका अटक केली. जाल्यार योगराज साळवे सयत पळून गेल्ल्या तिगां दुबावितांचो पुलीस सोद घेतात. मजगतीं, म्हापशें प्रथमश्रेणी न्यायालयान दुबावीत मोहम्मद शमशेर हाका स दीस पुलीस कोठडेंत दवरपाचो आदेश दिला. फुडलो तपास पुलीस उपनिरिक्षक आशिष पोरोब करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
