भांगरभूंय | प्रतिनिधी
पणजी, प्रतिनिधी : सांतीनेजच्या ताज विवांता जंक्शन ते सांत ईनेज चर्च मेरेनचो रस्तो पुरायपणान बंद केला. शुक्रारा महसूल मंत्री बाबुश मोन्सेरात हांणी स्मार्ट सिटीचें काम सुरू आशिल्ल्या ह्या रस्त्याची पळोवणी केली. ह्या वेळार हो रस्तो येरादारीक पुरायेन बंद करचो असो आदेश तांणी दिलो.
विवांता जंक्शन ते सांत ईनेज चर्च मेरेनचो रस्तो बंद केल्ल्यान आतां ते वटेनचो रस्तो वापरप्यांक जंक्शना कडल्यान चर्ची कडेन वचपाक दयानंद बांदोडकर मार्गाचो वापर करचो पडटलो. पळोवणी केल्या उपरांत मोन्सेरात हांणी, काम सुरू आसलें तरी ह्या रस्त्या वयल्यान दोन चाकी येरादारी सुरू आशिल्ली. मात हांगच्या थळाव्यांनी हे विशीं कागाळ केल्ली. येरादारीक लागून हांगा व्हडा प्रमाणांत धुल्ल उडटा, ताका लागून त्रास सोंसचे पडटात अशें थळाव्यांनी सांगलें. ते प्रमाण हो रस्तो पुरायेन बंद करपाचे आदेश कंत्रादाराक दिल्यात.
स्मार्ट सिटीचीं कामां नियोजीत वेळार जातात. कंत्राटदारांक आदेश दिल्ले प्रमाण कामां जातात. मात कांय लोकांक आपूण स्वता अभियंते आशिल्ल्याचें दिसता. ताका लागून ते कामा विशीं सल्ले दितात. स्मार्ट सिटीचीं कामां ३१ मे मेरेन पुराय जातलीं. लोकांनी कांय काळ सहकार्य करप गरजेचें, अशें मंत्री मोन्सेरात हांणी सांगलें. पणजे बांदिल्ल्या बस स्टॉपाचें नियोजन अयोग्य आसा. हें बस स्टॉप प्रवाशांचो विचार करून बांदूंक ना. हे विशीं आपणें मुख्यमंत्र्यांक पत्र बरोवन बसका घेवपाची मागणी केल्या अशेंय तांणी ह्या वेळार म्हणलें.
लोकसभेंत भाजपाकूच जैत
लोकसभा वेंचणुकेंत दोनूय जाग्यांचेर भाजपाकूच जैत मेळटलें. उत्तरेक भरपूर मतांनी जिंकतले. दक्षीणेंतूय आमचो उमेदवार जिखतलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
