भांगरभूंय | प्रतिनिधी
मडगांव, प्रतिनिधी : एसजीपीडीए नुस्त्याच्या बाजारा कडलो बायोमिथेनेशन प्रकल्प बंद केला. पालिकेन कोयर उखल्ल्या उपरांत सगळो वोलो कोयर काकोड्यां, कुडचड्यां धाडटात. ताका लागून त्या प्रकल्पाची गरज ना. हो प्रकल्प कायमचो बंद केला अशें ना. मात सध्यातरी बंद आसा. फकत तो पर्याय म्हणून उपलब्ध आसतलो, अशें मंत्री आलेक्स सिक्वेरा हांणी सांगलें.
दक्षीण गोंय जिल्होधिकारी कार्यालयांत मंत्री आलेक्स सिक्वेरा हांणी लोकांच्यो समस्या जाणून घेतल्यो. आपल्या खात्याचे जे प्रस्न आसा ते सोडोवपाक शकतां. हेर खात्यांचे प्रस्न मुख्यमंत्र्यां कडेन माडटात. आदले भेटी परस हे खेपो चड लोकांनी विवीध खात्याच्यो समस्या मांडल्यो, अशें तांणी सांगलें. आदल्या हॉस्पिसिओ इमारतींत खुरीस आशिल्लो भाग भलायकी तपासणी केंद्रा खातीर वापरचो अशी मागणी एका शिष्टमंडळान केल्या. राष्ट्रीय महामार्गाचें काम पुराय जाल्ल्यान नागोवा आयलँड ते नुव्यां मेरेन येवपी रस्तो डिनोटिफाय करपाची मागणी केली.
उतोर्डा उदकाचो प्रस्न व्हड आशिल्ल्याची कसलीच कागाळ आपल्याक येवंक ना. पंचायतीन न्हय, मात खंयच्याच पंचानूय आपल्या कडेन हे विशीं कागाळ करूंक ना वा उदकाचो टँकर धाडपाचीय मागणी करूंक ना, अशें मंत्री सिक्वेरा हांणी सांगलें.
दक्षीण गोंय जिल्होधिकारी कार्यालयाचे दुरुस्तीचें काम सुरू जालां. मात हे इमारतीचे दुरुस्तीचें काम वांगडाच करपाची मागणी केल्ली. मात तशें करिनासतना टप्प्याटप्प्यांनी एकेक माळयेचें काम करपाच्यो सुचवण्यो केल्यो. ताका लागून इमारतीचो हेर भाग वापरूं येता. ३१ मे मेरेन पुराय इमारतीचे दुरुस्तीचीं कामां पुराय करतले. मात ह्या म्हयन्याचे निमाणे मेरेन सकयले माळये वयलें काम पुराय जातलें अशें सिक्वेरा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
