भांगरभूंय | प्रतिनिधी
पणजी, बातमीदार ः महसूल गुप्तचर संचालनालयान जप्त केल्लीं तीन पुर्विल्लीं शिल्पां गोंयच्या भारतीय पुरातत्व सर्वेक्षण विभागा कडेन दिल्यांत. हांतूत अष्टभुज गणपती, उमा-महेश्वर आनी पूत श्री गणेश आनी कार्तिकेय हांचे वांगडा पार्वतीचे शिल्पांचो आस्पाव आसा. पणजेच्या कस्टम खात्याच्या हेरिटेज म्युझियमांत हीं तीनय शिल्पां प्रदर्शना खातीर दवरल्यांत.
देशभरांत सात सुवातींनी अशे तरेच्यो कार्यावळी आयोजीत केल्ल्यो. तस्करां कडल्यान जप्त केल्लीं अशीं वट्ट 101 पुर्विल्लीं वस्तू आनी हस्तलिखित भारताच्या पुरातत्व सर्वेक्षण विभागाकडेन दिली. जप्त केल्लीं वस्तू भारताच्या पुरातत्व सर्वेक्षण विभागाकडेन दिवपाच्या ह्या कार्यावळींत अर्थमंत्री निर्मला सीतारामन ऑनलायन पद्दतीन हाजीर आशिल्ली.
पुरातत्व खात्याक दिल्ली शिल्पां 2007 वर्सा कस्टम खात्यान जप्त केल्लीं. अष्टभुज गणेश मूर्त ही नर्तक मुद्रांतली गणेश मूर्त. तातूंत गणेशाचो विश्वनाच, सृश्टीची रचना आनी विनाशाचे शाश्वत चक्र दाखयला. बसिल्ल्या आसनांत उमा- महेश्वराची मूर्त आसा. हांतूत शिव आनी पार्वतीन मुकूट घाल्ले दिसतात. हे कलाकृतींत पार्वतीन एका हातान शिवाक वेंग मारली आनी दुसऱ्या हातांत हारसो धरिल्ल्याचे दिसता.
पार्वती देवीची मूर्त ही चतुर्भूज ललित देवीची मूर्त. ललिता हें पार्वती देवीचें एक रूप. पार्वतीचें ह्या रूपांचे मुखेलपणान उदेंत भारतांत पुजा करातात. पार्वतीच्या ह्या रुपाची ब्राह्मंड पुराण, देवी भागवत पुराण, अग्नि पुराण आनी पद्मपुराण हातूंत विंगड विंगड तरांनी तोखणाय केल्ली आसा. समपद मुद्रांतल्या सप्तरथाच्या पीठाचेर दवरिल्ल्या दुप्पट पाकळ्यांच्या कमळाच्या आसनाचेर ही देवता उबी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
