भांगरभूंय | प्रतिनिधी
चेन्नय, खबरां संस्था ः इंडियन इन्स्टिट्यूट ऑफ टेक्नॉलॉजी (आयआयटी) मद्रासान भारतीय मसाल्या विशीं मनोरंजक संशोधनाचे पेटंट मेळयलां. भारतीय मसाल्याचो उपेग करून कॅन्सर बरे करपाक वखद तयार करूं येता असो दावो ह्या संशोधनांत केला. ताची क्लिनीकल ट्रायल बेगीनच सुरू जातली आनी 2028 मेरेन हीं वखदां बाजारांत उपलब्ध जांव येता अशी म्हायती आयतारा (25 फेब्रुवारी) संशोधकांनी दिली.
भारतीय मसालो फुफ्फुसांचो कॅन्सर, थानाचो कॅन्सर, कोलन कॅन्सर, गर्भाशय कॅन्सर, तोंडांतल्या कॅन्सराच्यो आनी थायरॉयड कॅन्सर पेशींत कॅन्सरा आडची क्रियाशीलता दाखयता असो दावो संशोधकांनी केला. हे मसाले सामान्य पेशींत सुरक्षीत उरतात. सध्या संशोधक ताचो खर्च आनी सुरक्षेच्या आव्हानांचेर वावुरता. ताचो अभ्यास जनावरांचेर केला अशेंय तांणी सांगलें. प्रतिक्षा ट्रस्टा वरवीं आयआयटी मद्रासचे आदले विद्यार्थी आनी इन्फोसिसचे सहसंस्थापक गोपालकृष्णन हांचे निधींतल्यान हें संशोधन चालू आसा.
मुखेल शास्त्रीय अधिकारी जॉयस निर्मला हांणी सांगलें, जायत्या अभ्यासांत ताका लागून सामान्य कॅन्सर बरे करपाक मेळटात असो दावो केला, पूण कॅन्सर बरे करपाक कितलो डोस गरजेचो आसा हें चांचणेंतल्यान स्पश्ट जातलें. सध्या कॅन्सराचेर उपचार करपाचे जायते दुश्परिणाम आसात, पूण उण्या दुश्परिणामांनी सवाय कॅन्सराचेर उपचार तयार करप हो आमचो हेत आसा. आमचो देश संवसारांतलो सगळ्यांत चड मसाले उत्पादन करपी देश. आमच्या देशांत मसाल्याचें उत्पादन खूब सवाय जाता. हीं वखदां इंजेक्शनान दिवचीं न्हय अशें आमकां दिसता. दुयेंती हें वखद गिळूं शकतले.
आयआयटी मद्रासच्या रसायन अभियांत्रिकी विभागाचे प्राध्यापक आर नागार्जन हांणी सांगलें, कॅन्सराचीं वखदां तयार करपा खातीर आण्विक पातळेचेर स्थिरताय चड म्हत्वाची. आमी आमच्या लॅबांत एक स्थिर उत्पादन तयार केलां. प्रयोगशाळेंत संशोधन चालूच उरतलें. जनावरांच्या अभ्यासांत सकारात्मक परिणाम जाले उपरांत आतां आमी क्लिनीकल ट्रायल टप्प्यांक सुरवात करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
