भांगरभूंय | प्रतिनिधी
पणजीः रोखड्योच गोंयच्या रस्त्यांचेर 30 ई अॅक्सिसिबल रिक्षा धांवतल्यो. ताका लागून व्हिलचॅर वापरपी दिव्यांग व्यक्तींक प्रवास करप सोंपें जातलें. ह्य व्यक्तींक पोट भरपाची संद मेळची हे खातीर रिक्षा चलोवपा खातीर लेगीत दिव्यांग व्यक्तींक प्राधान्य दितले, अशी म्हायती राज्य दिव्यांगजन आयुक्त गुरुप्रसाद पावसकार हांणी दिली. पावसकार हांणी सांगलें, आंतरराष्ट्रीय पर्पल फेस्ट मजगतीं व्हिलचॅर प्रवेशसुलभ ई रिक्षांचो वापर केल्लो. ह्यो रिक्षा दिव्यांग व्यक्तीं खातीर खूब फायदेशीर थारल्यात. हे संबंदांत आमकां बरे अभिप्राय मेळिल्ले. हाची दखल घेवन आमी हो उपक्रम सुरू करपाचो निर्णय घेतला. ते प्रमाण गोंयभर व्हिलचॅर- प्रवेशसुलभ प्रवास क्षेत्रांची निर्मिती करतले. हाका लागून गोंयांतल्या दिव्यांगजनांक भौशीक प्रवासी येरादारी सेवा सोंपे तरेन वापरपाक मेळटली. तशेंच व्हिलचॅर वापरपी व्यक्तींक आनी ज्येश्ठ नागरिकांक लेगीत हे सेवेचो फायदो जातलो. हे वरवीं दिव्यांग व्यक्तींक तांच्या प्रवासांत येवपी आडखळी पयस जातल्यो. हाका लागून व्यक्ती स्वातंत्र्याक उर्बा दिवपाच्या यत्नांक चालना दितात. हो उपक्रम सर्वसमावेशकतेचे दिशेक उबारिल्लें आनीक एक पावल आसा.
नोंदणी करपाचो उलो
हे संदीचो लाव घेवन सक्षम जावचे खातीर दिव्यांग व्यक्तींक राज्य दिव्यांगजन आयुक्त कार्यालया कडेन 9156321900 ह्य नंबराचेर संपर्क करचो, असो उलो दिव्यांगजन आयुक्त गुरुप्रसाद पावसकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
