भांगरभूंय | प्रतिनिधी
डॉ. प्रमोद सावंतः न्हावेली 30 कोटींच्या उदरगत कामांक सुरवात
भांगरभूंय ।प्रतिनिधी
दिवचलः डबल इंजीन सरकारान गोंयांतल्या दरेका घरांत समृद्धी येवचे खातीर येवजण्यांचो शिंवर घातला. दरेक गांव, दरेक पंचायत, पालिका विभाग आदर्श सुविधांनी भरिल्लो करपाचो सरकाराचो यत्न आसा. हे प्रक्रियेंत कांय खेपे लोकांक त्रास सोंसचो पडटा, मात लोकांनी पुराय आदारदिवन मुळाव्या मानवी उदरगतीचे प्रक्रियेक आदार केलो जाल्यार दर गांव आदर्श करप हो आमचो निश्चेव आसा, अशें मुख्यमंत्री डॉ. प्रमोद सावंत हांणी सांगलें.
न्हावेली पंचायत वाठारांत 20 कोटी खर्च करून 11 केव्ही वीज केबल न्हावेली ते मायणा फिडरच्या कामाची सुरवात, तशेंच विवीध उदरगतीच्या कामांच्या माध्यमांतल्यान सुमार 10 कोटींच्या विवीध कामांची सुरवात मुख्यमंत्र्यां हस्तुकीं केलीं.
ह्या वेळार वीज खात्याचे सचीव पुनीत कुमार गोयल, प्रधान मुख्य अभियंता उत्तम पार्सेकार, मुख्य अभियंता स्टिफन फर्नांडीस, गोपाळ सुर्लकार, सरपंच कालिदास गांवस, कृष्णा गांवस, राजेंद्र फाळकार तशेंच पंचायत वांगडी आनी हेर मानेस्त हाजीर आशिल्ले.
वीज मळार गोंय आघाडेर आसा. पुराय भारतांत गोंयांत सगळ्यांत उणो वीज दर, भुंयगत वीज केबल आनी हेर सुविधांक लागून दरेका घरांत नेमान वीज पुरवण करपाक येस आयलां. तशेंच रस्ते आनी मुळाव्या सुविधांचें जाळे विणटना कांय खेपे लोकांक धुल्ल आनी हेर कारणांक लागून त्रास जाता. तांणी उदरगतीचे हे प्रक्रियेंत पुराय आदार करपाचें थारायिल्ल्यान आयज गोंय राज्य गतीन उदरगतीचे वाटेर पावलां मारता. दर पंचायत वाठारांत पंचांनी फुडाकार घेवन दरेका घरांत समृद्धी येवचे खातीर विशेश योगदान दिवचें, असो उलो मुख्यमंत्री डॉ. सावंत हांणी मारलो. मुख्यमंत्री डॉ. सावंत हांणी पंचायत वाठारांतल्या विवीध येवजण्यांचो शुभारंभ एकेच सुवातेर नांव तकट्याचें अनावरण करून केलो. कालिदास गांवस हांणी सांगलें, पंचायत वाठारांत खूबश्यो उदरगतीचीं कामां चालीक लागिल्ल्यान लोक समाधानी आसात. मुख्यमंत्री खऱ्या अर्थान आधुनीक गोंयचे शिल्पकार थारतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
