साबार प्रस्नांचेर उपाय काडपाक सरकाराक अपेस

भांगरभूंय | प्रतिनिधी

एल्वीस गोम्सः पेडणें ते काणकोण मेरेन काडटले भारत जोडो यात्रा

भांगरभूंय । प्रतिनिधी

फोंडें: भाजप सरकाराच्या फाटल्या 10 वर्सांच्या काळांत गोंयांतल्या लोकांचेर समाजीक अन्याय जाल्ल्याचें दिसता. फाटल्या कांय वर्सांत साबार प्रस्नांचेर उपाय काडपाक सरकाराक अपेस आयलां. लोकांक दिल्लीं आस्वासनां अजून लेगीत पुराय करूंक ना. ते खातीर येता ते लोकसभा वेंचणुकेंत भाजप सरकार परतून लोकांक आस्वसनांचें हायस दाखोवन दिशाभूल करतलें. हे खातीर लोकांक जागृत करचे खातीर काँग्रेस पक्षा वतीन पेडणें ते काणकोण मेरेन भारत जोडो यात्रा काडटले, अशी म्हायती काँग्रेस फुडारी एल्वीस गोम्स हांणी पत्रकार परिशदेंत दिली.

गोंयांतल्यो खणी पुराय बेकायदो आसात. ताचेर खर कारवाय करची, अशें निवेदन 3 नोव्हेंबर 2011 ह्या दिसा तेन्नाच्या काँग्रेस राजवटींत तेन्नाच्यो राष्ट्रपती प्रतिभा पाटील हांकां भाजपा फुडाऱ्यांनी दिल्लें. तेन्नाचे भाजपा प्रदेशाध्यक्ष लक्ष्मीकांत पार्सेकार, नरेंद्र सावयकार, खासदार श्रीपाद नायक आनी फ्रान्सीस डिसोझा, संजीव देसाय तशेंच हेरांनी निवेदन दिवन बेकायदो खणींनी घुस्पल्ल्यांचेर खर कारवाय करपाची मागणी केल्ली. पूण 2012 त भाजपा सत्तेर आयले उपरांत भाजपाचे फुडारी बेकायदो खण वेवसायांत घुस्पल्ल्यां आड कारवाय करपाक अपेशी थारले. उरफाटे आरोप केल्ल्या फुडाऱ्यांक पक्षांत प्रदेश दिवन तांकां बरी उपमा दिली, अशें गोम्स हांणी सांगलें. हे पत्रकार परिशदेंत फोंडें काँग्रेस गट समितीचे अध्यक्ष विलियम आगियार, अ‍ॅड. ह्रदयनाथ शिरोडकार आनी हेर पदाधिकारी हाजीर आशिल्ले.