भांगरभूंय | प्रतिनिधी
पेडणें, प्रतिनिधी ः पै काणे कंपनीच्या स्कॅपाक काल दनपारां सुमार 12.30 वरांचेर उजो लागलो. सुमार देड वरां यत्न केल्या उपरांत उजो पालोवपी दळाच्या जवानांक उजो पुरायपणान पालोवपाक येस मेळ्ळें. हे दुर्घटनेंत 80 हजार रुपयाचें लुकसाण जाल्ल्याचो अदमास आसा.
मेहता नांवाच्या मनशान उजो पालोवपी दळाच्या आपत्कालीन फोन नंबराचेर संपर्क सादलो आनी तुयां पै काणे कंपनी लागसार उजो लागिल्ल्याची म्हायती दिली. ही म्हायती मेळ्ळे उपरांत रोखडेच पेडणें उजो पालोवपी दळाचे सहायक अधिकारी सुनील देसाय आपल्या वांगड्या सयत घडणूक सुवातेर पावले. आनी उजो पालोवपाचो यत्न केलो.
कंपनी भायर आशिल्ल्या सुक्या तणाक हो उजो लागलो आनी गरम वातावरण आशिल्ल्यान तो उजो पाताळ्ळो. हातूंत पै काणे गटाच्या स्क्रॅपाक उजो लागलो आनी सुमार 80 हजारांचें लुकसाण जालें, जाल्यार पेडणें उजो पालोवपी दळाच्या कर्मचाऱ्यांनी सुमार 2 लाखांचें लुकसाण जावपा पसून वाटायले. ह्या वेळार पेडणें उजो पालोवपी दळाचे जवान राजन खरात, विकास चव्हाण, राजेश परब, धनंजय वस्त, संदेश पेडणेकार, सर्वेश पार्सेकार हाजीर आशिल्ले.
ह्या दिसांनी उश्ण हवामानाक लागून सुक्या तणाक उजो लागपाचे प्रकार व्हड प्रमाणांत घडटात. फेब्रुवारींत सुमार 56 वेगवेगळ्या प्रकारचे कॉल उजो पालोवपी दळाक आयले, तातूंतले सुमार 80% सुक्या तणाक उजो लागिल्ल्याचे आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
