भांगरभूंय | प्रतिनिधी
मुंबय, प्रतिनिधी : मुंबयचे ‘बेस्ट’च्या पास दरांत वाड जाल्या. १ मार्च सावन हो दर लागू जातलो. ‘बेस्ट’ प्रशासनाचो येरादारीचो उपक्रम लुकसाणांत आसा. पालिकेच्या अर्थसहाय्याचेर बेस्टच्यो गाडो कश्योबश्यो चलतात. ताका लागून बेस्टान आपल्या सदच्या आनी पास दरांत कांय बदल केल्यात. म्हयन्याळ्या पासांतूय वाड केल्या.
बेस्टाचो येरादारी वेवसाय व्हड लुकसाणांत आसा. बेस्टाक कर्मचार्यांचो पगार पालिकेच्या आदारान दिवचो पडटा. बेस्टान आपलें उण्यांत उणें तिकीट दर पांच रुपया केल्यात, उपरांत प्रवासी वाडटले अशी बेस्टची अपेक्षा आशिल्ली. मात, बेस्टची सदचो प्रवाश्यांचो आंकडो सुमार २५ लाखां कडेन येवन रावला. एका काळार बेस्टच्या सदच्या प्रवाश्यांचो आंकडो ३५ लाखां लागीं आशिल्लो. कोरोना काळांत बेस्टाक व्हड लुकसाण सोंसचें पडलें. कोरोना काळांत लोकल सेवा आनी हेर सेवा बंद आसतना मुंबयत बेस्टच्या वाहनांनी गरजेच्या सेवेंतल्या कर्मचार्यांची येरादारी सुरु दवरून मुंबयक जागोवपाचें काम बेस्टान केल्लें.
कितली दरवाड
बेस्टान आतां पास दर (अमर्यादीत प्रवास) ५० रुपयां वयल्यान ६० रुपया वाडयल्या. तशेंच अमर्यादीत पास आतां ७५० रुपयां वयल्यान ९०० रुपया जालां. गणभेस घालपी विद्यार्थ्यां खातीर आदले प्रमाणे फुकट पास आसतलो. सुदारिल्ले बसपास येवजणेंत वट्ट ४२ जाग्यार आतां १८ तरेचे सवलतीचे बसपास आसतले. ह्या बस पासांत ६ रु., १३ रु., १९ रु., तशेंच २५ रु. मेरेनच्या आतांच्या एसी आनी नोनएसी प्रवास भाड्याचे सप्तकी आनी म्हयन्याळे पास उपलब्ध केल्यात. अमर्यादीत बसप्रवासा खातीर सदचे ६० रुपया आनी ९०० रुपया अशे बसपास उपलब्ध केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
