भांगरभूंय | प्रतिनिधी
कोलकाता, खबरां संस्था: उत्तर २४ परगणा जिल्ह्यांतल्या संदेशखाली हांगा जाल्ल्या हिंसाचाराचो मुखेल दुबावीत आनी तृणमूल कॉंग्रेसीचो थळावो फुडारी शाहजहान शेख (५३) हाका अस्तंत बंगाल पुलिसांनी आयज अटक केली. ताका आयज बशीरहाट न्यायालयांत हाजीर करतले.
पुलिसांच्या म्हणण्या प्रमाण मीनाखान वाठारांतल्या एका घरांत शाहजहान लिपिल्लो.
शाहजहान आनी ताच्या वांगड्यांचेर जमनी घेवपाचे आनी बायलांचेर अत्त्याचार केल्ल्याचे गुन्यांव नोंद आसात. हे अत्त्याचार भायर आयल्या उपरांत तांचे आड संदेशखाली भागांत आंदोलन सुरू जालें. ५ जानेवारीक रेशन घोटाळ्यांत ईडीचे अधिकारी शाहजहान शेखची चवकशी करपाक गेल्ले कडेन तांचेर लोकांनी हल्लो केल्लो. तेन्नाच्यान शाहजहान शेख गायब आशिल्लो.
कलकत्ता उच्च न्यायालयान शाहजहान प्रकरणांत राज्य सरकाराचेर चेंपण हाडल्या उपरांत ताका अटक केली. कांय दिसां पयलीं शेख मेळनाशिल्ल्यान उच्च न्यायालयान तिडक उक्तायल्ली. शेख हांचे वांगडी उत्तम सरदार आनी शिवप्रसाद हाजरा हांणीय लिंगीक अत्त्याचार केल्ल्याचे आरोप आसात. ह्या आरोपां उपरांत भाजपान तृमणूल कॉंग्रेसी आड निदर्शनां केल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
