भांगरभूंय | प्रतिनिधी
रवी नायकः दिवचले सुसज्ज कार्यालयाचें उक्तावण
भांगरभूंय । प्रतिनिधी
दिवचलः गोंयचें नागरी पुरवण खातें हें म्हत्वाचें खातें. फाटलीं कितलीशींच वर्सां धान्न वितरणाची वेवस्था करपी संस्थांक खूबश्यो नव्यो येवजण्यो तशेंच खूबशे नवे बदल घडयतले. दरेका कुटुंबाक पोटभर अन्न तशेंच हे मुखार दरेका घरांत धान्य पावोवपाची येवजण आंखतात. कोणूच उपाशी उरचो न्हय, हो प्रधानमंत्री नरेंद्र मोदी हांचो संकल्प प्रत्यक्षांत हाडटात, अशें नागरी पुरवण मंत्री रवी नायक हांणी सांगलें.
दिवचल बाजारांतल्या नगरपालिकेच्या छत्रपती शिवाजी महाराज संकुलांत सुसज्ज सुवातेंत नागरी पुरवण दिवचल कार्यालयाचें स्थलांतर केलां. ताचें उक्तावण केले उपरांत मंत्री नायक उलयताले.
ह्या वेळार आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष कुंदन फळारी, उपनगराध्यक्ष दीपा पळ, खात्याचे संचालक जयंत तारी हाजीर आशिल्ले.
वेगवेगळ्या माध्यमांतल्यान लोक सरकाराक कर फारीक करता. त्या करांतल्यान दरेका घराक, दरेका कुटुंबाक विवीध माध्यमांतल्यान येवजण्यो पावोवन थाकाय दिवप, गरिबांचें कल्याण करप, तशेंच दरेका घरांत समृद्धी हाडप हो सरकाराचो हेतू आसा. ते खातीर आमचे यत्न चल्ल्यात, अशें मंत्री नायक हांणी सांगलें.
खासदार म्हूण आमणे देड वर्स काम केलें. त्या वेळार 58 अॅम्ब्युलन्सी उपलब्ध करून दिवन सेवी दिली. नेमान लोकां कडेन नातें जोडलां. नागरी पुरवण खात्या वतीन लेगीत खूबश्यो येवजण्यो लोकां मेरेन पावोवपाचो आपलो ध्यास आसा, अशें मंत्री नायक हांणी सांगलें.
आमदार डॉ. शेट्ये हांणी सांगलें, नागरी पुरवण खातें हे आदीं सामके ल्हान सुवातेंत चलतालें. स्थलांतरीत केल्ल्या कार्यालयाची सुवात धा पटींनी व्हड आसा. हाका लागून लोगांचीं कामां रोखड्या रोखडीं जातलीं तशेंच लोकांक बरी सेवा मेळटली. रेशन कार्ड आनी हेर ज्यो कांय समस्या आसात, त्यो ताकतिकेन सोडोवचे खातीर सगळे तरेचे यत्न करतले, अशें तांणी सांगलें.
आमदार शेट हांणी सांगलें, खात्या वतीन खूबश्यो बऱ्यो येवजण्यो लोकां मेरेन पावोवपा खातीर खातें वावुरता. मंत्री नायक हांचो बरो आदार मेळटा.
पालिका संकुलांत नागरी पुरवण खात्याचें कार्यालय आयिल्ल्यान पालिकेक अर्थीक उत्पन्न मेळटलें, हे खातीर नगराध्यक्ष फळारी हांणी समाधान उक्तायलें.
जयंत तारी हांणी खात्याच्या विवीध येवजण्यांची म्हायती दिली. घरच्या घरा रेशन कार्ड सुविधा उपलब्ध करप तशेंच हेर सुविधांची म्हायती दिली. सुरज शेट्ये हांणी येवकार दिलो. राजन कडकडे हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
