भांगरभूंय | प्रतिनिधी
रुतूटेक कंपनीच्या गुदांवांतल्या लाखांनी रुपयांचे मालमत्तेचो गोबर
भांगरभूंय । प्रतिनिधी
वाळपयः होंडा उद्देगीक वसणुकेंतल्या रुतूटेक एंटरप्रायझेस ह्या गादी, उशी तयार करपी कारखान्याक उजो लागून लाखांनी रुपयांचें लुकसाण जालें. वाळपय उजो पालोवपी दळाच्या जवानांनी ताकतिकेन घडणुकेचे सुवातेर वचून खर मेहनती उपरांत रातच्या 8 वरांच्या सुमाराक उज्याचेर नियंत्रण मेळयलें.
पिसुर्लें आनी होंडा वाठारांत व्हड प्रमाणांत कारखाने आसात. थंय उजो पालोवपी दळाचें कार्यालय स्थापन करचें, अशी नेमान मागणी करतात. मात ताचे कडेन आडनदर केल्ल्यान ताचो मार उद्देगीक वसणुकेंत चलपी कारखान्यांचेर जातात, अशें आस्थापनांच्या धनयांचें म्हणणें आसा. होंडा आनी पिसुर्लें उद्देगीक वसणुके खातीर उजो पालोवपी दळाचें कार्यालय थंय सुरू करचें, ही मागणी परतून एकदां नेठ धरपाक लागल्या.
मेळिल्ले म्हायती प्रमाण, पिसुर्ले उद्देगीक वसणुकेंत सुरू आशिल्ल्या गादयो, उशीं करपाच्या कारखान्याक अचकीत उजो लागलो. ही घडणूक सांजेच्या 6 वरांच्या सुमाराक घडली. ज्या गुदांवाक उजो लागलो तातूंत व्हड प्रमाणांत कपडे भरिल्ले.
वाळपय उजो पालोवपी दळाचे अधिकारी संतोष गांवस हांणी दिल्ले म्हायती प्रमाण उजो लागपा फाटलें कारण अजून स्पश्ट जावंक ना. हे संबंदांतली चवकशी चालू आसा. रातच्या 8 वरांच्या सुमाराक उजो पालयला खरो पूण उजो अजून धुंवरेता. मजगतीं, गुदांवाक लागिल्ल्या उज्याचो धग कुशीक आशिल्ल्या दोन कारखान्याक बसलो. त्या कारखान्यांतलें लेगीत कांय सामान लासलें, अशी म्हायती मेळ्ळ्या.
दोन उद्देगीक वसणुको
सत्तरी म्हालांतल्या होंडा आनी पिसुर्लें अश्यो दोन उद्देगीक वसणुको आसात. दोनूय वसणुकांनी साबार तरांचे कारखाने आसात. पिसुर्ल्यां व्हड प्रमाणांत रसायनीक कारखाने आसात. मात अजून मेरेन ह्या वाठारांत उजो पालोवपी दळाचें कार्यालय मात ना. दोन म्हयन्यां आदीं होंडा उद्देगीत वसणुकेंतल्या एका कारखान्याक असोच उजो लागिल्लो. शॉर्ट सर्कीट जावन लागिल्ल्या उज्यांत कोट्यांनी रुपयांचें लुकसाण जाल्लें. ह्या दोनूय वसणुकांक 12 किलोमिटर अंतराचेर आशिल्ल्या वाळपय उजो पालोवपी दळा वतीन सेवा दितात. दळाक वसणुके कडेन पावपाक सुमार अर्दे वर लागता. ह्या वाठारांत उजो पालोवपी दळाचें कार्यालय आशिल्लें जाल्यार आयज जालां तें लुकसाण वाटावपाक मेळपाचें. सरकारान ही गजाल गंभीरतायेन घेवचें आनी उजो पालोवपी दळाचें कार्यालय स्थापन करचें, अशी मागणी ह्या वाठारांतले वेवसायीक संघटणेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
