भांगरभूंय | प्रतिनिधी
भांगरभूंय । प्रतिनिधी
पणजीः कोलवाळच्या मध्यवर्ती बंदखणीतल्या कैद्यांनी तयार केल्ल्या वस्तूंची ‘सीजे’ ब्रँड नावांन विक्री जातली. पणजे बसस्टॅण्डा कडल्यान हिरा पॅत्रोल पंपा लागीं ह्या वस्तूंची विक्री करपी दुकानाचें उक्तावण जालें. ह्या वेळार पुलीस म्हासंचालक जसपाल सिंग, बंदखण म्हानिरीक्षक ओमवीर सिंग बिष्णोय आनी हेर अधिकारी हाजीर आशिल्ले.
बंदखणीतल्या ख्यास्त भोगपी कैद्याच्या कला गुणांक वाव मेळचो हे खातीर आमी व्हो उपक्रम सुरू केला. कैद्यांनी तयार केल्लो हातकला वस्तू, लाकडी वस्तू, मेणवाती आनी हेर कला कुसरीच्यो वस्तू दुकानांत विकपाक दवोरल्यात. तातूंतल्या मेळपी पयश्यांतले कांय पयशें कैद्यांक दितले अशें जसपाल सिंग हाणे सांगलें. कैद्याचें जिणेत सकारात्मकताय हाडपा खातीर असले उपक्रम बरे थारतात. हाचे पयलीं दिल्लीच्या तिहार बंदखणींत असोच उपक्रम सुरू केल्लो. गोंयांत वस्तूंक बरो प्रतिसाद मेळ्ळ्यार हेर राज्यांत लेगीत अशीं दुकानां सुरू करपाचो आमचो यत्न आसतोलो. लोकांनी पणजेंतल्या दुकानांत वचून चडांत चड वस्तू विकत्यो घेवचो अशें ताणे मागलें.
सध्या कोलवाल बंदखणींत 98 कैद्यांनी वस्तू तयार करपाच्या उपक्रमांत वांटो घेतला. फुडाराक तातूंत वाड जातली. आमी बायल कैद्यां खातीर बेकरी युनीट आनी मसालो युनीट सुरू करपाचो विचार चलयला. बंदखणींतल्या कैद्यांक तरेकवार कामा दितात, बंदखणींत रंगकाम आनी सोबितीकरणाच्या कामांत आमी कैद्याची मजत घेतिल्ली अशी म्हायती ओंमवीर सिंग बिष्णोय हांणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
