भांगरभूंय | प्रतिनिधी
भांगरभूंय । प्रतिनिधी
फोंडेंः दयानंदनगर धारबांदोड्या हांगच्या दत्त मंदिरांत गुरू प्रतिप्रदे निमतान आयोजीत केल्ले गीत रामायण कार्यावळीक रसिकांनी बरो प्रतिसाद दिलो. दत्तप्रसाद गांवस आनी ताच्या वांगडी कलाकारांनी ही कार्यावळ रंगयली.
सुरवेक दत्त देवस्थानाचो अध्यक्ष राजेंद्र देसाय, ज्येश्ठ नाट्य दिग्दर्शक गिरीश वेळगेकारआनी गायक कलाकारांचे हस्तुकीं दिवली पेटयली. भारत सरकारा वतीन प्रकाशीत हिंदीत गीत रामायणाचो अणकार करपी दत्तप्रसाद जोग हाचो देवस्थानाच्या अध्यक्षच्या हस्तुकीं भोवमान केलो. नाट्य दिग्दर्शक गुरुदास गाड हाणे हे कार्यावळीचें सूत्रसंचालन केलें.
कार्यावळींत ग दी माडगुळकर रचीत आनी सुधीर फडके आनी संगीतबद्द केल्ल्या गीत रामायणांतली 29 पदां दत्तप्रसाद गांवस आनी हेर गायक कलाकारांनी सादर केली. ताकां मनोज गणपुलेन संवादिनीचेर आनी सतीश हेगडेन तबल्याचेर साथसंगत केली. बाळकृष्ण मेस्त हाणे सिंथसायजर आनी सायड रिदमाचेर योगेश रायकारान साथ दिली. कार्यावळ सोपचे पयलीं मंदार गांवकारान सगल्या कलाकारांचो परिचय करून दिलो. कार्यावळीक दिवचल, वाळपय, साखळी आनी हेर वाठारांतले संगीत मोगी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
