भांगरभूंय | प्रतिनिधी
मडगांव, प्रतिनिधी : कुंकळ्ळेच्या उद्देगीक वसणुकेच्या भायल्या जाग्यार क्वालिटी एक्स्पोर्ट कंपनीन बांयच्या भोंवतणी बेकायदेशीरपणान उबारिल्ली राखणे वणट आनी हेर बांदकामां आयज मडून उडयलीं. आदीं थळाव्या कार्यकर्त्यांनी कुंकळ्ळी आयडीसींतल्या प्रदूशण आनी बेकायदो कामांचेर कारवायेची मागणी केल्ली, तांचे मागणेक येस येवंक ना.
कुंकळ्ळी उद्देगीक वसणुकेंतल्या बेकायदेशीर बांधकामां आड थळाव्या नागरिकांनी बोवाळ केल्लो. ताचे पयलीं कंपनी लागसारचे बांयचे उदक बेकायदेशीरपणान काडून वापरता, असो आरोप तांणी केल्लो. हे विशीं कागाळ केल्या उपरांत विजेचो पंप तशेंच हेर सामान सरकारी यंत्रणांनी काडून कारवाय केल्ली. आतां हे बांयचे भोंवतणी आशिल्ली राखणे वणट काडून उडोवपाची मागणी विरोधी पक्ष फुडारी युरी आलेमांव हांचे वांगडा थळावे कार्यकर्ते अविराज देसाय, ऍड. पॅट्रिक मोंतेरो, ऍड. आशिष देसाय, मारियानो सोरेस, सँडी लेटाओ, प्रसाद लोटलीकार आनी हेरांनी केल्ली. आतां सरकारी यंत्रणांनी ही बेकायदेशीर राखणे वणट मोडून उडयल्या.
थळाव्या कार्यकर्त्त्यांनी आजूनय हेर आयडीसींतल्या बेकायदां बांधकामांचेर कारवाय करची. उद्देगीर वसणुकेंत जावपी प्रदुशणाचेर नियंत्रण हाडचें अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
