भांगरभूंय | प्रतिनिधी
वास्को, प्रतिनिधी: दाबोळी विमानतळ बंद जावपाच्यो प्रतिक्रिया आयकूंक येतनाच दाबोळी विमानतळ प्राधिकरणाचे संचालक धनंजय राव हांणी दाबोळी विमानतळ चालूच उरतलो असो विस्वास उक्तायलो. दाबोळी विमानतळार प्रवाशांचो आंकडो उणो जाल्ल्याचें तांणी मान्य केलें. तशेंच येवपी काळांत नव्या सुवातांचेर विमानसेवा सुरु जातली. दाबोळी विमानतळार व्हड तांक आशिल्ल्याचें तांणी स्पश्ट केलें.
एअर इंडिया, ओमन एअरवेजन आपली विमानसेवा मोपा विमानतळा वयल्यान सुरू केल्या. आतां जून म्हयन्या सावन कतार एअरवेजची विमानसेवा मोपा व्हरतले. ताका लागून विंगड विंगड प्रक्रिया उक्तायतना दिसता. दाबोळी विमानतळा वयल्यान आतां राजकारणीय आपले प्रतिक्रिया दितात. मात, कांय जाणांनी दाबोळी विमानतळ चालूच उरतलो अशेंय सांगलें. तेन्ना धनंजय राव हांणीय दाबोळी विमानतळाच्या फुडारा विशीं चिंता करपाची गरज नाशिल्ल्याचें तांणी सांगलें.
कतार एअरवेज ऑपरेटरान आपली सेवा मोपा वयल्यान सुरू करपाचें थारायलां. तो तांचो स्वताचो निर्णय. आमी तांच्या निर्णयाचो आदर करता. कतारच्यान सद्दां एक विमान येता अशें राव हांणी सांगलें. मोपाक लागून दाबोळीचेर परिणाम जाला. फाटल्या वर्सा दाबोळी विमानतळा वयल्यान ८.४ दशलक्ष प्रवाशांक हाताळिल्ले. मात, अंदू हो आंकडो सात दशलक्षाच्या लागीं पावला. दाबोळी विमानतळार प्रवाशांचो आंकडो सुमार १५ ते २० टक्क्यांनी देंवला अशें तांणी सांगलें.
चार्टर विमान ऑपरेटर्स दाबोळी विमानतळाक आजूनय प्राधान्य दिता. देशांतली विमानसेवा आजूनय दाबोळी विमानतळार तशीच आसा. हातूंत व्हडलोसो फरक जावंक ना. येवपी मार्च सावन इंडिगो आपली हैदराबाद-गोंय- पुणे अशी विमानसेवा सुरु करतलें. ताका लागून दाबोळी विमानतळ चालूच उरतलो. हातूंत कांयच दुबाव ना, अशें धनंजय राव हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
