भांगरभूंय | प्रतिनिधी
गोंय प्रदेश काँग्रेस युवा मोर्चाची मागणी
पणजी, बातमीदार ः कंत्राटी पदां भरपा खातीर लांच मागपी इन्फो टेक मंडळाच्या अधिकाऱ्याक बेगोबेग निलंबीत करपाची मागणी करपा खातीर गोंय प्रदेश काँग्रेस युवा मोर्चान आयज मंडळाच्या कार्यालयांत वचून आंदोलन केले. हे वेळार मोर्चाचे अध्यक्ष महेश नाडर आनी हेर कार्यकर्ते हाजीर आशिल्ले.
कांय दिसां आदीं मंडळाच्या अधिकाऱ्याचो कथित ऑडिओ व्हायरल जाल्लो. हातूंत संबंदीत अधिकारी मंडळांतल्या नोकरे खातीर एका तरणाट्याकडेन एक लाख रुपया लांच मागतालो, अशें उक्तें जालें. हे विशीं युवक काँग्रेसीच्या कार्यकर्त्यांनी कार्यालयांत हाजीर आशिल्ले यशस्विनी बी. हांकां जाप विचारली. संबंदीत अधिकाऱ्या आड चवकशी चालू आसा आनी दक्षता खात्यांत कागाळ केल्या अशें यशस्विनी हांणी स्पश्ट केलें.
मजगतीं, त्या अधिकाऱ्याक बेगोबेग निलंबीत करपाची मागणी युवा काँग्रेसीच्या कार्यकर्त्यांनी केली. हाचेर यशस्विनी हांणी कायद्या प्रमाण तशें करपाक मेळना अशें सांगलें. हाचे उपरांत कार्यकर्त्यांनी कार्यालयांतच घोशणा दिवपाक सुरवात केली. ह्या प्रकारा उपरांत पुलिसांनी तांकां भायर काडले.
एके वटेन गोंयांत बेरोजगारी वाडली आसतना सरकारी कर्मचारी गरजेवंत तरणाट्यांक लुटतात. बेरोजगारांक न्याय मेळचो अशी मागणी करतना पुलिसांनी आमकां भायर काडले. ह्या पदां खातीर 7 अर्ज आयिल्ले. तातूंतल्या एकाय मनशाची निवड जावंक ना. ह्या सगल्या अर्जदारांकडल्यान एक लाख रुपया मागल्यात काय हाचीय चवकशी करची अशें नाडर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
