भांगरभूंय | प्रतिनिधी
मडगांव, प्रतिनिधी: मडगांवच्या रेल्वे स्टेशन वाठारांत प्लॅटफॉर्म क्रमांक सचेर चार अनवळखी तरणाट्यांनी मारपेट करून रेल्वेचे कनिश्ठ अभियंते मिथून राज के. के. हांकां लुटिल्ले. ही घडणूक २६ तारखेर घडली. हे विशीं कागाळ नोंद जाले उपरांत कोकण रेल्वे पुलिसांनी दुबावितांक चोवीस वरां भितर अटक केली. दुबावीत समीर गुरशद बेपारी (२६, रा. कुबा मशिदीनजीक नावेली, मूळ हुबळी), कासिम जाफरसाब कुंदगन (२३, रा. एसएम कृष्णा नगर, ओल्ड हुबळी) आनी सादीक जाफरसाब नलबांद (२२, रा. ओल्ड हुबळी) ह्या कर्नाटकांतल्या तिगांक वेर्णा वाठारांतल्यान अटक केली.
२६ फेब्रुवारीक रातच्या ११ वरांचेर मडगांव रेल्वे स्टेशनाच्या प्लॅटफॉर्माचेर कोणूच नाशिल्ल्याचें पळोवन रेल्वेच्या कनिश्ठ अभियंत्याक लुटपाचो यत्न केल्लो. पुलिसां कडल्यान मेळिल्ले म्हायती प्रमाण, कागाळदार मिथुन राज के. के. (३३, रा. केरळ) हे मडगांव रेल्वे स्टेशना वयल्यान स्वामी विवेकानंद रेल्वे हॉलिडे होम हांगा वताले. प्लॅटफॉर्म क्रमांक ६ वडल्यान वतना थंय आनीक कोणूच नाशिल्ल्याचे पळोवन २० ते ३० वर्सां पिरायेच्या तरणाट्यांनी तांकां आडयलें. तांणी मिथून हांचे कडेन पयशे मागले. तांणी पयशे दिवपाक न्हयकार दिलो. देखून तिडकल्ल्या त्या सगळ्यांनी मिथून हांचेर मुठी आनी थापटां फुलोवन ताच्या पाकिटांतल्यान १ हजार रुपया आनी रेल्वे ईमरजन्सी पास जबरदस्तीन काडून घेतलो. उपरांत मिथून हांकां बँक ऑफ इंडियाच्या एटीएमांत व्हरून पांच हजार रुपया काडूंक लायले. ते पयश्यां सयत ताचे कडेन आशिल्ली पोती आनी तांतले ६५० रुपया काडून घेवन थंयच्यान पळ काडली.
हे विशीं मिथून राज के. के. हांणी कोकण रेल्वे पुलिशेंत येवन चार दुबावितां आड गुन्यांव नोंद केलो. पुलीस निरीक्षक सुनील गुडलर हांचे सयत कोकण रेल्वे पुलीस तपास करीत रेल्वे स्टेशना वयली सीसीटीव्ही फुटेज तशेंच थळाव्यां कडल्यान म्हायती मेळ्ळ्या उपरांत पुलिसांनी चोवीस वरां भितर दुबावितांक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
