भांगरभूंय | प्रतिनिधी
पणजी, बातमीदारः फाटल्या कांय वर्सांत राज्यांत घटस्फोटाचें प्रमाण वाडत आसा. 2019 वर्साचे तुळेंत 2023 वर्सा घटस्फोटाचें प्रमाण 1.72 टक्क्यांनी वाडलां. 2019 वर्सा राज्यांत नोंद जाल्ल्या लग्नांच्या तुळेंत 4.18 टक्के घटस्फोटाचीं प्रकरणां नोंद जाल्यात. 2023 वर्सा ही टक्केवारी 5.88 टक्क्यांनी वाडली. ही म्हायती राज्य नोंदणी खात्यांतल्यान मेळ्ळ्या.
मेळिल्ले म्हायती प्रमाण, 2019 ते 2023 ह्या काळांत राज्यांत 41 हजार 757 लग्नांची नोंद जाल्या. वर्साक सरासरी 8351 आनी म्हयन्याक सरासरी 696 लग्नांची नोंद जाल्या. 2029 वर्सा 9325 लग्न आनी 390 घटस्फोट नोंद जाल्यात. लग्नाच्या तुळेंत घटस्फोटाचें प्रमाण 4.18 टक्के आशिल्लें. 2020 वर्सा हें प्रमाण 4.32 टक्के, 2021 वर्सा 3.26 टक्के, 2022 वर्सा 4.38 टक्के आनी 2023 वर्सा 5.88 टक्के आशिल्लें.
राज्यांत फाटल्या चार वर्सांच्या तुळेंत 2023 वर्सा दर म्हयन्याक सरासरी घटस्फोटांचो आंकडो सुमार देड पटींनी वाडला. 2019 ते 2022 ह्या चार वर्सांत वट्ट 1349 घटस्फोट जाले. हाचो अर्थ वर्साक सरासरी 337 घटस्फोट आनी म्हयन्याक सरासरी 28 घटस्फोटांची नोंद जाली. 2023 ह्या एकाच वर्सा दर म्हयन्याक सरासरी 40 घटस्फोट जाले.
सासश्टींत सगळ्यांत चड घटस्फोट
तालुक्या प्रमाण 2019 ते 2023 ह्या काळांत सासश्टी तालुक्यांत सगळ्यांत चड लग्नां तशेंच घटस्फोटांचो आंकडो नोंद जाला. मजगतीं सासश्टींत 8378 लग्न आनी 589 घटस्फोट नोंद जाल्यात. लग्नाच्या तुळेंत घटस्फोटाचें प्रमाण 7.03 टक्के आशिल्लें. हें प्रमाण राज्याच्या एकंदरीत सरासरी परस चड आसा.
धारबांदोड्यां सगळ्यांत उणे घटस्फोट
राज्यांत 2019 ते 2023 ह्या काळांत धारबांदोड्ड्यां तालुक्यांत सगळ्यांत उणें लग्न आनी घटस्फोटांचो आंकडो नोंद जाला. मजगतीं, धारबांदोड्ड्यां 726 लग्न आनी फक्त 13 घटस्फोट नोंद जाल्यात. घटस्फोटाचें प्रमाण लग्नापरस 1.79 टक्के उणें आशिल्लें.
| वर्स | लग्न | घटस्फोट | घटस्फोटाचें प्रमाण (टक्क्यांत) |
| 2019 | 9325 | 390 | 4.18 |
| 2020 | 6655 | 288 | 4.32 |
| 2021 | 8527 | 278 | 3.26 |
| 2022 | 8953 | 393 | 4.38 |
| 2023 | 8296 | 488 | 5.88 |
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
