भांगरभूंय | प्रतिनिधी
गुजरात एटीएस, नौदळ आनी केंद्रीय एजन्सीची जोड कारवाय
पोरबंदर, खबरां संस्था: गुजरात एटीएस, नौदळ आनी केंद्रीय एजन्सीचे जोड कारवायेंतल्यान मंगळारा अरबी दर्यांतल्या भारतीय शिमे वयल्यान ३३०० किल घुवळे वखदां जप्त केल्यांत. तांचें मोल २ हजार कोटी परस चड आसा. ५ विदेशी ड्रग्स विक्रेत्यांक अटक केल्या. हे वेपारी इराणी वा पाकिस्तानी नागरिक आशिल्ल्याचो दुबाव आसा.
पांच दिसां आदीं गिर सोमनाथ पुलिसांनी वेरावाल शारांतल्या एका घांटाचेर ३५० कोटी रुपयांचीं घुंवळे वखदां जप्त केल्लीं. त्या वेळार णव जाणांक अटक केल्ली. तेन्ना सावन दिल्ली नार्कोटिक्स कंट्रोल ब्युरो (एनसीबी), गुजरात एटीएस आनी हेर केंद्रीय एजन्सी ह्या वेपार्यांक धरपा खातीर वावुरतात. दर्याचे शिमे वयल्यान मादक पदार्थ जप्त करपाची आतां मेरेनची ही सगळ्यांत व्हडली कारवाय. इराणी बोटीचेर आशिल्ल्या परदेशी पॅडलरांक रातीं उसरां पोरबंदर हाडले. पांच विदेशी पॅडलर इराणी बोटींतल्यान ३३०० किलो ड्रग्स व्हरताले. मंगळारा रातीं उसरां तांकां पोरबंदर दर्यादेगेर हाडले.
वेरावाल बंदराच्या दोन किलोमीटर अंतराचेर ड्रग्स जप्त
एके बोटीचेर पयलींच लक्ष दवरून आसा, अशें वेरावाल बंदर घांटाचे बोटीचे धनी जितू कुहाडा हांणी सांगलें. मंगळारा रातच्या णव वरां सुमाराक दोग जाण अनवळखी गाडयेंतल्यान धक्यार पावले आनी बोटींतल्यान कांय वस्तू आपले गाडयेंत घालपाक लागले. पंगडान ताचो फाटलाव केलो तेन्ना तांकां वेरावाल बंदरा पसून दोन किलोमीटर अंतराचेर धरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
