भांगरभूंय | प्रतिनिधी
नवी दिल्ली, खबरां संस्था ः लोकसभा वेंचणुकेची ‘सर्त’ लागीं पावल्या. लोकसभेची वेंचणूक कार्यावळ ह्याच वा मार्च म्हयन्याच्या पयल्या सप्तकांत जाहीर जावंक शकता. आमच्या तिसऱ्या कार्यकाळांत आमी देशा खातीर व्हड निर्णय घेतले अशें प्रधानमंत्री नरेंद्र मोदी हांणी सांगलें. आतां तांच्याच मंत्रीमंडळांतल्या एका फुडाऱ्यान 2029 वर्साय प्रधानमंत्री नरेंद्र मोदी प्रधानमंत्री म्हणून वेंचून येतले,असो अदमास उक्तायला.
2029 वर्साय नरेंद्र मोदीच
‘नरेंद्र मोदींची प्रधानमंत्री म्हणून तिसरो कार्यकाळ सुरू जातलो. तेच प्रमाण चवथ्या टर्मांत लेगीत म्हळ्यार 2029 वर्साय मोदीच ह्या देशाचे प्रधानमंत्री जातले. अंदूं भाजपाक 370 आनी एनडीएक 400 परस चड सुवाती मेळटल्यो. म्हजो अदमास चुकीचो न्हय. तिसरी आनी चवथी टर्म प्रधानमंत्री नरेंद्र मोदीचींच आसा. अशें विधान संरक्षण मंत्री राजनाथ सिंह हांणी केलां.
अर्थीक मळार देशांत चमत्कार…
देशांत अर्थीक मळार व्हडलो चमत्कार जाला. मोदींचेर लोकांचो विस्वास आसा. अर्थीक मळार तांणी जे पद्दतीन काम केलां तें उत्कृश्ट आसा. आमचें अर्थवेवस्थेची उदरगत खूब बरें तरेन जाता. संवसारांतले खंयच्याच देशाचे अर्थवेवस्थेचो ‘ग्रोथ रेट’ इतले नेटान वाडूंक ना. भारत ही संवसारांतली ‘फास्टेट ग्रोईंग इकोनॉमी’. आतां आमची चार ट्रिलियन अर्थवेवस्था जाल्या. भारताक अर्थवेवस्थेच्या मळार तिसरे सुवातेर पावपा पसून खंयचोच देश आडावंक शकना, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
