देव बोडगेश्वराच्या पादुकांची पेटी फोडली, दोगांक अटक
भांगरभूंय | प्रतिनिधी
म्हापशें, प्रतिनिधी ः म्हापशेंच्या देव बोडगेश्वर देवळांत आयज फांतोडेर साडेचारांक चोरांनी देवाच्या पादुकांची पेटी फोडली. सुरक्षा रक्षक देवळांत न्हिदिल्लो तेन्ना दोन चोर देवळाच्या वाठारांत भितर सरले. देवा मुखार आशिल्ली पादुकांची पेटी चोरांनी फोडली. म्हापशें पुलिसांनी गुन्यांव नोंद करून चोरांचो सोद घेवपाक सुरवात केल्या.
ही पेटी हारश्याची. तातूंत भितर भक्त देणगी घालतात. चोरांनी जेन्ना ती फोडपा खातीर तिचेर बडी मारली तेन्ना व्हडलो आवाज जालो. हारसो फुटिल्ल्यान व्हडलो आवाज जालो. त्या आवाजान सुरक्षा रक्षकाक जाग आयली. तांणी व्हडल्यान आरड मारली. तेन्ना चोरांनी थंयच बडी सोडून हांताक लागली तितली रक्कम घेवन थंयच्यान पळ काडली. उपरांत सुरक्षा रक्षकान देवूळ समिती कडेन हे घडणुकेची म्हायती दिली. पुलिसांक म्हायती दिल्या उपरांत पुलिसांनी येवन पंचनामो केलो आनी फुडली चवकशी चालू दवरलीं.
उपरांत ह्या प्रकरणांत म्हापशें पुलिसांनी चवकशी करुन रोखडेंच मूळ कर्नाटकांतल्या सागर शिंदे (४०) आनी आनंद नायक (४०) ह्या दोन दुबावितांक धरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
